ЁМА

Картупель му борйысь
Аддзи важся гыр.
Сісьмыштӧма дорыс,
Куйлӧма нин дыр.

Чомйӧ сійӧс кыска
Сьӧкыд мешӧк моз.
Бура сійӧс мыська —
Лоас дзоридз доз.

Гортӧ мунны куті,
Видзӧда да — рос.
Кокӧй татчӧ-й тутіс,
Вомын лои кос.

Оз-ӧ тадзи вылам
Ёма баба дур?
Ог-ӧ босьт да ылав,
Налькйӧ сылы сюр?

Ёма, кӧнкӧ, волӧ
Сиктаным быд рыт.
Видзчысьнытӧ колӧ
Ывла вылын быть:

Тэн кӧ паныд кывтӧ
Крукыль ныра пӧч,
Ӧдйӧ курччы кывтӧ —
Нинӧм тэн оз вӧч.

Челядь кыяндырӧ,
Быттьӧ зэлыд ньӧв,
Ёма юрӧ пырӧ
Уна пӧлӧс мӧвп.

Кыдзи ме кодь воксӧ
Тшыкӧдны выль ног,
Лэдзны ассьыс лёксӧ,
Вайны йӧзлы шог.

Кӧсъяс — зверӧ пӧртас,
Лоан тэрыб кӧр.
Либӧ юӧ йӧртас,
Лоан тшӧтя йӧрш.

А ме тӧда стӧча
Сылысь мустӧм дум:
Менӧ каньӧн вӧчас,
Сюяс гыръяс — дзум.

Челядь пиысь некод
Сэтшӧм збой эз вӧв,
Наян-наян — ме кодь:
Талунсянь
И век кежлӧ
Дугда юны йӧв!