КОДІ МЫЖА?

Керчомъясянь (Кулӧмдін карулын) вӧлі тайӧ тӧлысяс мӧдӧдӧма машиннӧй тӧварищество Сыктывдінкарӧ мортӧс — ньӧбны видз-му уджалан машинаяс. Мортыд вӧлі ньӧбӧма Госсельскладысь кутшӧмсюрӧ машинаяс; мыйкӧ мында сетӧма задатки, ӧстаткисӧ уджӧн 1927 воӧдз. Сӧмын, тыдалӧ, мортыд абу сюсь вӧлӧма, машинаяс йывсьыд нинӧм оз тӧд. Сы вӧсна сэсся бура ыджыд убытка лоӧма машиннӧй тӧвариществолы. Медколан машинаыс — вартан машина — вӧлӧм некытчӧ оз шогмы: важ, жугалӧма, уджавны оз позь. Тадзинад, весьшӧрӧ тӧвариществолӧн сьӧмыс воши, машина эз ло.

Коді мыжа тані?

Позьӧ мыждыны тӧвариществолысь правленньӧсӧ, мед эз мӧдӧд сэтшӧм тӧдтӧм мортӧс. Мӧдарӧ кӧ, ме чайта, мыжаӧсь татшӧм шогмытӧм машинаяссӧ вузалысьясыс. Прӧстӧй деревняса морт веритчӧма машинаяс вузалысь вылӧ, сетӧма сьӧм, кырымалӧма вексель — и ставыс, видзӧдлыны бурджыка абу кужӧма (мый тӧдтӧгыд видзӧдан?). Сэсся тай со — машина пыдди воис лӧп.

Оз ков тадзи водзӧ кежлӧ вӧчны! Тадзинад сӧмын крестьянатӧ бокӧ тойлалан кооперативъясӧ ӧтувтчӧмысь: тадзинад найӧ оз кутны машинаяс лӧсьӧдӧм вылад бура видзӧдны — «пӧръяласны пӧ», шуасны.

Мукӧд пӧлӧс ӧтувтчӧмъяслы колӧ видзчысьӧмӧн гырысь кӧлуйтӧ ньӧбавны, медым эз лоны татшӧм ӧшыбкаясыд.

В. С.