КУРАН

Батьӧй вӧчис куран,
Медым курта бура.
Жергӧдӧм ёсь пиня,
Ме кодь лоас винёв.

Шонді синмӧс ёрӧ,
Пӧсьӧй киссьӧ шорӧн.
Ставсьыс водзӧ муна,
Турун юр — медуна.

Регыд сувтас зорӧд
Эжва чукыль дорӧ.
Сэки эштас уджӧй —
Купайтчыны вуджа.

Батьӧй юръяс лыддьӧ,
Броткӧ — ошкӧм пыдди:
«Турун юрыд дзоля,
Пажынтӧгыд колян».

Быттьӧ горда гетшкӧ,
Батьлы воча тшетшка:
«Татшӧм ичӧт куран
Ыджыда оз юрав».