ЛУКОМОРЙӦ

Кыдз пу бара пашкыртчӧм веж коръя.
Воккӧд сійӧс гартам трактор чептӧн.
Тані миян лоас Лукоморйӧ.
Увйыс вылӧ Васька каньӧс лэптам.

Керка бокысь лыасӧ ми гуръям,
Кисьтам ваӧн тыртӧм пельса дорӧ.
Шевкнитчӧма тані чукля куръя,
Пельса пытшкын муткырасьӧ морӧ.

Мургигмозыс Васька мойдны мӧдас
Либӧ пондас ливкйӧдлыны сьылан.
Колӧкӧ, и сьӧкыд нӧдкыв нӧдас
Коми йӧзлӧн олӧм-вылӧм йылысь.

Васька каньным нявзӧ мыйкӧ надзӧн.
Кӧнкӧ, сьылӧ сьылан либӧ нӧдӧ.
Колӧкӧ, и мойдсӧ нургӧ тадзи,
Кань кывсӧ ми ог на бура тӧдӧй.

Сӧмын абу туялысьлӧн быттьӧ
Васькалӧн ныр-вомыс — вывті наян.
Дерт жӧ, каньным сюсьӧн асьсӧ лыддьӧ:
Лэбачтӧ кӧть ӧні жӧ тэд ваяс.

Нявзӧм зэв нин гора мыйкӧ лоис,
Тайкӧ Васька ускыс йылӧдз повзис.
Черинылыд, буди, татчӧ воис?
Пушкин гижӧд ӧмӧй збыльысь ловзис?

Сідзкӧ, миян йӧрӧ регыд усьӧ
Нитшка юрсиа, рой тошка Вӧрса.
Аддзывлытӧм зверыд локтас гусьӧн,
Кыйӧдчыны кутас миян бӧрся.

Потшӧс дорын вуджрасьӧ нин мыгӧр —
Сера гӧна юра, сувтса пеля.
Синмыс ӧзйӧ — гырысь биа ӧгыр.
Сюран талы — чашвартас сё пельӧ!

Кынмис Васька каньным — пӧрис мырйӧ,
Мойд да сьылан сылӧн дзикӧдз вуніс.
Тшӧтьсӧ лэптіс, равӧстіс горштырӧн —
Кыдз пу вывсянь увлань юрӧн суніс.

Васька каньӧс нуӧ, быттьӧ тӧлӧн,
Ош кодь повтӧм, биа ур кодь перыд.
Сылы воча пызйӧ потшӧс пӧлӧн
Сера кысӧ. Аддзывлытӧм зверыд!..

Лукоморйӧ колис миян садӧ.
Воккӧд век на кутам гуся лача:
Гашкӧ, мӧдысь лӧсялана кадӧ
Мойдысь каньыс локтас татчӧ ачыс?