СЛӦН

Миян парма вотӧс пиын кӧрыс
Медся чӧскыд, юмов чӧдыслӧн.
Веськыда ыб кузя шалсъя вӧрас.
Видзӧда да, паныд локтӧ слӧн.

Быгалӧма шонді водзын бокыс.
Тоньгӧдчӧма нора потш кодь ныр.
ӧдва вӧрӧ сюръя кыза кокыс,
Кӧнкӧ, абу шойччылӧма дыр.

Мыйӧн слӧныс воӧдчис ме дорӧ,
Грыпкысьӧмӧн пуксис пырысь-пыр.
Сы вылӧ ме кайи пошкӧмсорӧн,
Быттьӧ вені джуджыд-джуджыд кыр.

Слӧнӧс ыштӧ важысянь нин тӧді:
Восьті сылы ассьым гуся дум.
Слӧныд дыр эз мӧжгы, регыд мӧдіс
Мыччӧдлыны меным ылыс му.

Сэтчӧс олӧм — гыа паськыд саридз,
Сэтчӧс йӧзтӧ йӧктӧмысь он кут.
Сэні аньяс новлӧны кузь сари,
Кымӧс шӧрас пуктӧны гӧрд чут.

Индияӧ, гажа югыд муӧ,
Веськавлыны усис меным шуд!
Радейтӧмӧн сьӧлӧмыд сэн туӧ,
Быттьӧ тувсов кадӧ — ва дор луд...

Чӧд пыддиыс гортӧ турун вайи —
Батьӧй пыр и някыртіс мен юр.
Мыйла нӧ пӧ зорӧд вылас кайин?
Ньӧръяла кӧ, мӧдысь тадз он дур.

Морӧс пытшкӧ йӧрті гылыд серам.
Эг нин висьтав, лунтыр шӧйті кӧн.
Кыдз нӧ батьӧй гӧгӧрвоны вермас:
Тайӧ эз вӧв зорӧдным, а слӧн?