КЫДЗИ СКӦТӦС БУРМӦДНЫ

Видзӧдлан кӧ миян мӧс стада вылӧ, он аддзы прамӧй кык мӧскӧс, ставыс кутшӧмкӧ косньӧдӧсь, посньыдӧсь — ыж кодьӧсь. Йӧв йылысь кӧ сёрниӧ воан, пыр кылан: «Зэв этша вайӧ менам Калюшӧй, дзикӧдз вӧраыс косьмӧма»...

Збыльысь, миян мӧскыд посни, сёйны — сёйӧ, йӧв вывті этша вайӧ. Во гӧгӧрнас миян мӧскыд ваяс зэв нин уна 60 либӧ 70 ведра йӧв.

Босьтам кӧ кытыськӧ мӧдлаысь (шуам кӧть, Голландияысь) — сэн ӧти мӧскыс вонад йӧвсӧ сетӧ 600 ведраӧдз — сизим мында унджык миян дорысь.

Мыйла нӧ сідзи?

Со мыйла. Сэтчаняд нелямын во сайын нин йӧзыд кутчысьӧмаӧсь бурмӧдны скӧтсӧ, бур рӧд лӧсьӧдны — ӧткодь, ён, гырысь рӧд.

Позьӧ-ӧ миянын лӧсьӧдны та ногӧн? Позьӧ. Колӧ бур рӧдысь мӧсъяссӧ кольӧдны, судзӧдны бур рӧдса (племеннӧй) ӧшъясӧс, видзны мӧсъястӧ бура, шоныдінын, югыдінын, вердны-юктавны пӧраӧ, ёна дӧзьӧритны.

Дерт, первойтӧ ӧтка крестьянинлы сьӧкыд лоӧ тайӧ уджӧ кутчысьны. Колӧ ӧтувтчӧмӧн босьтчыны, сэки нинӧм, кокньыдика вочасӧн скӧттӧ позьӧ бурмӧдны.

Оз ков вунӧдны: скӧт кӧ бур, олӧм бур — куйӧд уна лоӧ, няньыд унджык воас, овны лоӧ кокньыдджык.

С.