ПЕЛЫСЬ

Нора ымзӧ пелысь керка паныд:
Ӧкмыс во нин колис, ӧкмыс во,
Кыдзи гуга лоис олӧм баныс,
Тайӧ садсӧ пуктысьыс эз ло.

Ӧкмыс во нин пелысь олӧ руын,
Быттьӧ ассьыс мыджӧд воштӧм морт,
Вужнас ӧдва кутчысьыштӧ муӧ.
Регыд сыысь кольӧ сӧмын орт.

Кывтӧ пелысь шогӧдан мӧвп ньылыд —
Ӧзын дорысь мынӧм ветки пыж.
Берегӧдзыс сӧмын зэв на ылын,
Да и домыс орӧ — вывті рыж.

Пелысь корсьӧ пӧчӧс — ассьыс пӧвсӧ,
Мукӧд могсӧ вуштіс ыджыд гы.
Со и войнас торкӧ садлысь чӧвсӧ
Визув ваӧ тёльскан пелыс шы.

Но оз аддзы пӧчӧс сылӧн пелысь —
Торъялӧма ордымныслӧн вож,
Кылалӧма ылӧ лопта пелыс,
И оз косӧд сійӧс кадлӧн пож.