ВӦСНИ КОКА БЕРБА

Ӧтчыд садйын вӧсни кока берба
Весьӧпӧртіс менӧ пашкыр чалльӧн,
Кӧні вӧлі сяргӧдчӧма бальӧ —
Выльӧн чужӧм посни пушыд лэбач.

Менӧ сотіс мӧвп, мый лоас чудӧ,
Ки пыдӧсӧ ёкмыльсӧ кӧ пукта,
Быттьӧ дзебанінысь зарни чуктас, —
Тайӧ чайтсис медся ыджыд шудӧн.

Чеччалі да чеччалі мый вынысь
Муса берба бальӧясла лунтыр,
Усурмунӧмла ныр вылӧ сунтӧдз,
Но эз войтышт весиг и шуд джынйыс.

Арыс меным бердіс шуштӧм вӧтӧн:
Батьӧй сӧтіс черӧн берба пусӧ,
Шудӧй вылӧ лача менам кусі,
Зарниасьысь садйыс лои сьӧдӧн.

Берба бальсӧ думысь соддзын кутла,
Чери моз кор шудыс пышйӧ киысь,
И сэк кольӧ кытыськӧ лов пиысь
Корсьны вын, мед судзӧдчыны шудла.