ВОТ МЫНТӦЙ СРОКӦ!

Регыд деревняын пондасны чукӧртны сельскокӧзяйственнӧй налог. Став налог перъян уджыс таво агентъяс киысь вешйӧ мӧдлаӧ — волисполкомӧ. Таво бара уналаын няньыд оз во. Сы понда Государстволӧн рӧскод содӧ — колӧ ӧд нянь вотӧминъясыслы отсавны. Быдсяма пӧлӧс отсӧг, кутшӧмӧс сетӧ рабоче-крестьянскӧй правительство, — няньӧн и кӧйдысӧн, сьӧм водзӧсалӧмӧн скӧт видзӧм вылӧ, водзӧ кежлӧ косьмӧмысь видзӧмӧн — быдпӧлӧс отсӧг вылӧ колӧ уна сьӧм.

Тырмӧмӧдз отсӧг сетны Правительство вермас, налог чукӧртан удж кӧ деревняын мунас бура, крестьяна кӧ став налогсӧ мынтасны срокӧ.

Сӧветскӧй власьт, кыдз вермӧ, кокньӧдӧ крестьяналы налог мынтӧмсӧ. Крестьянскӧй заёмӧн кӧ пондасны крестьяна мынтыны налогтӧ, сійӧ чинӧ 10% вылӧ.

Колӧ та йылысь став крестьянаыслы висьтавлыны. Мед найӧ тӧдӧны, кыдзи кокньыдджык налогтӧ мынтыны. Колӧ быд крестьянинлы висьтавны, мый понда таво колӧ ёнджыка старайтчыны бура да регыдджык налогтӧ мынтыны.

Таво крестьяна оз лэдзны асланыс Сӧвет власьтлы воны сэтшӧм пикӧ, кутшӧмӧ воліс миян Республика 1921 воын, отсаласны сылы, мынтасны налог дзоньнас срокӧ.