* * *

Енэжланьысджык колӧ кутчысьны,
енэжланьысджык,
мед турӧбыс тэнӧ оз нӧбав
и му бердас йӧрт.
И кок туйыд медкӧ оз тӧдчы
и туйпомыд вошас,
ӧд сэтчаньысь тэнӧ
некод корсьны оз мӧд.

Енэжтасӧдыс тувччав тэрмасьтӧг,
енэжтасӧдыс,
и велӧдчы торйӧдны гӧгӧрсьыд
быдсяма пас,
мед олӧмыд дозмӧрлӧн быдзанӧн
паськыда воссяс
и сьӧлӧм ӧдзӧссьыд вештас
сьӧдасьӧм тас.

Енэж сьӧмӧсас сэсся кыпӧдчы,
енэж сьӧмӧсас,
и сьӧлӧмтӧ мый вынсьыд пыдзрав,
кыдз гудӧк мек,
мед лолыд сынӧдсьыс донджык
да сӧстӧмджык лоас.
И сэк сӧмын эска ме тэныд.
Сӧмын сэк.