ПЛАТАН

Ота пучера пуӧн — платанӧн —
мен петкӧдчис муслун.
Сы дорӧ вайӧдіс сьӧлӧмӧй асъя лӧняс.
Кикарӧс пучерас пукті,
и меӧ сӧдзтысис енъюгыд выныс,
востымӧн ыпмуніс пытшкӧсам
югӧрсӧ чӧвтіг,
ырнялысь би киньӧн
сьӧлӧмам войтыштіс-водіс.
Тайӧ би киньсӧ
олӧм чӧж лелькуйтны понда,
медым вежӧртны
муслунлысь шемӧстан ыджыд вынсӧ.
Оз кӧ коркӧ востымӧ пӧр
да енъюгыдас воштысь.

Гашкӧ, тайӧс жӧ мӧвпыштліс
платан улын
Платон
муслун йылысь Федркӧд сёрнитігӧн?.. ^Платан улын Сократ сёрнитӧ Федркӧд радейтӧм йылысь. Сократ дорйӧ радейтӧмсӧ, аддзӧ сыын лов кыпӧдан вын./^