КЫР ЙЫЛӦ ТУЙ

1


Важ кадлӧн пасӧн меным лои
джуджыд кырйывса башня.
И восьтыны аслым сійӧс
кайи кыр йылӧ катӧдысь туйӧд.
Важ кадыс ыркнитіс мелань
и из тэчассянь,
и нитшсялӧм лабичсянь,
и му веркӧсӧ петӧм гырысь пу вужсянь.
Эз ыркнит сӧмын башнясянь:
кыр йылӧ пуксьӧм выль олӧмыс, буракӧ,
курыштӧма казьтылӧмсӧ —
юкмӧсӧс моз косьтӧма.
И ӧні он нин чӧсмась
сьӧлӧмтӧ мыськовтысь ваӧн.

2


Пу вылын морт син.
Кадӧн рисуйтӧм видзӧдлас.
Сійӧ азыма нёджъяліс ^Нёджъявны — видзӧдны./^ менӧ,
быттьӧ кӧсйис лыддьыны лолӧс.
И казьтыштіс таӧн бабӧс:
бабӧй лунтыр жӧ
видзӧдіс ӧшиньӧд ветлысь-мунысьӧс.
А сы вылӧ меліа дзорвидзис
джуджыд кыдз пуыс.