ПОС

1

Карл нима пос
нюжӧдчӧма
Влтава ю вомӧн
серӧдӧм мегыр моз,
и чайтан,
сійӧ век пондас вуджӧдны йӧзсӧ
ӧти берегысь —
мӧдӧ,
нэмысь —
нэмӧ,
и сылӧн олӧмын
нинӧмыс оз вежсьы.
И местасьыс весигтӧ чунь вомлӧс мында
оз вешты сійӧс кадыс.
Но войяснас, кор Прага узьӧ
и мунысь-ветлысьыс абу,
поскыслӧн орӧдчылӧ лолыс
и домысь лэдзӧм том чибӧ моз
рӧдтӧ вывлань,
сійӧс чужтӧм енэж сьӧмӧсӧ,
да асылӧдзыс йӧктӧ-лэбалӧ сэні
ас кодьыс жӧ шуда пос ловъяскӧд.

Войся пос вылӧ сэки
весиг гулю оз пуксьы —
полӧ: измас.

2


Посвывса статуяыс
абу-ӧ измӧм морт?
Сылӧн синмыс
кыскӧмӧн кыскӧ ас дорас,
быттьӧ кӧсйӧ висьтавны мыйкӧ,
но здук кежлӧ артмылӧм йитӧдсӧ
орӧдӧ йӧзлӧн локтӧмыс.
Статуя дорысь ылыстчигӧн
дыр на кылан мышнад
нор видзӧдлассӧ,
быттьӧ ёртыдлысь,
коді сідз эз и вермы
юксьыны тэкӧд шогнас,
а тэ тайӧс гӧгӧрвоин,
но нинӧмӧн эн отсав.

3


Паськыд Влтава
тувсовъя ыджыд ванас
нуис нин уна пос:
найӧ торкисны
сылӧн визувлысь ӧдсӧ.
Но ӧти пос,
Карл нима,
вӧрзьӧдіс сійӧс мичлуннас
да раммӧдіс,
быттьӧкӧ йӧзыс лэптісны тайӧ поссӧ
юыслы верӧс туйӧ
да чунькытшалісны поснас Влтавасӧ...
Тулыснас ойдӧм ю
азыма окаліс сійӧс
да вашкӧдіс мелі кывъяс.
А послӧн медыджыд кӧсйӧмыс вӧлі,
медым Влтава ӧдйӧджык нуас сійӧс татысь
да мынӧм пыжлы моз
лэдзас бӧрйыны ассьыс туй.