ЧӦРС

Важ ковтӧм кӧлуй лӧскӧ ^Лӧс — чардак./^ талун каті,
И баблӧн чӧрсыс ки улӧ мен сюри.
Сэк дум вылам пыр воис сійӧ кадыс,
Кор печкӧм сайын рытыс баблӧн тюрис.

Гӧрд джоджын чӧрсыс чожа йӧктіс-шургис
Да мургис кудель печкысьяслысь сьылан.
И шойччысь кань моз лӧсьыдысла кургис,
Кор артмӧм шӧртсӧ быдмаліс ас вылас...

Кузь олӧм чӧжыс бабӧн печкӧм шӧртыс
Ас нэм кузьтаыс, йитны кӧ, оз ло мӧй?
А гашкӧ, бабӧй збыльысь печкис-пӧртіс
Чӧрс вылас гартчысь шӧртас ассьыс олӧм?

Но ӧні сылӧн чӧрсыс лои ковтӧм
И мудзӧм тӧв моз другысь быттьӧ раммис.
А уджавтӧгыс сійӧ талун ловтӧм,
Ӧд печкынысӧ некод нин оз сяммы.

Но чӧрслӧн швыргӧм юрам век на кылӧ,
Чус ^Чус — быттьӧ./^ кодкӧ водзӧ лоан кадсӧ нӧдӧ
И менсьым да и йӧзлысь олӧм-вылӧм,
И, кодлӧн мыйта лоӧ, водзвыв тӧдӧ.

А гашкӧ, тайӧ чӧрсыс — ота ылдӧс,
И Енкӧлаыс бергалӧ сы гӧгӧр.
Но кытшсӧ артавны оз судзсьы лыдпас,
Дай некод оз куж Енкӧлаысь ӧтдор.

Но эм-ӧ кодкӧ Енкӧласӧ кутысь,
Код сылысь нэмсӧ водзвыв аддзӧ-тӧдӧ?
А гашкӧ, сійӧ збыльысь артмис чутысь
Да помтӧг содӧ ыджыд-ыджыд ӧдӧн?

Дзик вермас лоны, Енкӧлаыс коркӧ
Друг чинас да и пӧртчас кӧдзыд руӧ.
И миянлӧн му вылысь олӧм торкас
Да ставсӧ нуас аскӧдыс сьӧд гуӧ...

Морт бӧрын векджык кӧлуй-эмбур кольӧ,
Но вӧдитчысьтӧг олӧмныс тшӧтш орӧ.
А бабӧй йылысь ӧні меным дольӧ
Важ чӧрсыс юрын ловзьӧм шурган горӧн.

И менам, гашкӧ, коркӧ нучка лоас,
Но оз нин кывлы печкан чӧрслысь шургӧм,
А баблӧн керкаӧ кӧ коркӧ быттьӧ воас,
Чӧв-лӧньыс сылы мӧд ног воссяс-юргас.