КЫВЪЯС-КОРЪЯС

Кылалісны кывъясӧй виж коръясӧн,
Кылалісны арся юлӧн визулӧд.
Дзебсясисны, вӧйласисны, вошисны.

Ӧткымыныс сюрласисны, кыялі,
Кыялі да кывбуръясӧс лӧсьӧдлі,
Лӧсьӧдлі да мича рӧмӧн серлӧдлі,
Бордйӧді да сьывны найӧс ысталі.

Ӧткымыныс ю пыдӧсӧ вӧйтчисны,
Вӧйтчисны да оз нин бӧрсӧ кыпавны,
Оз нин бӧрсӧ кыпавны, оз воссьыны,
Ловтӧм сьӧкыд изйӧн сэтчӧ сибдісны.

Кылалісны кывъясӧй виж коръясӧн,
Кылалісны арся юлӧн визулӧд...