АРЛӦН ГИЖӦД

Арыс серӧдіс
	гылалӧм коръяснас
		мувывса эжсӧ,
Быттьӧ мичаа гижаліс
	вӧр-валысь быдсяма дум.
Сылӧн гижӧдыс
	вочасӧн сьӧктаммис,
		содіс да вежсис,
Быттьӧ арыслы отсасис
	вӧр-васа кутшӧмкӧ тун.

Арыс ворсӧдчис коръяснас,
	быттьӧкӧ мӧвпъясӧн гижысь,
Сӧмын коръяссӧ тэчигас
	нимъяссӧ налы эз сет.
Сійӧ сёрнитіс рӧмъясӧн:
	гӧрдӧн и рудӧн и вижӧн,
И быд кор вылӧ визьйӧдліс
	стихъяссӧ, быттьӧ поэт.

И ме босьтчывлі
	вежӧртны арыслысь
		гижӧдсӧ тайӧс,
Сӧмын мыйлакӧ сідз эг и гӧгӧрво
	ни ӧти кор...
Арыс такӧдіс менӧ,
	эн шогсьы пӧ,
		кадыс кор воас,
Тэныд вӧр-ваыс ёртлы моз вашкӧдас
	быд гусятор.