НЫВБАБА КОСТЫН
Миян коми нывбабаыд тай бӧръя воясас вель жӧ водзӧ тувччӧма. Кольӧм воясӧ вӧлі сійӧс собранньӧ вылад он жӧ кӧ кыскы-а. Ноксьӧ вӧлі гортас, уджӧн тырӧма. Мужиксӧ ублажайтӧ да кага-балясӧ дӧзьӧритӧ. Видасны кӧть нӧйтасны — нинӧм оз шу. Бӧрдыштас дай ланьтас. Мырддясны кӧть видз-мусӧ, керкасьыс кӧть вӧтласны — нинӧм оз шу. Бӧрдыштас дай ланьтас. Мужикыс кӧ эновтас, 4−5 челядьӧн куш нинӧмӧн коляс — нинӧм оз шу. Бӧрдыштас дай ланьтас. Оз вӧлі коми аньыд куж асьсӧ дорйыныс. Оз куж ассьыс нывбаба правасӧ корсьны. Кытчӧ нӧ пемыд бабаыд кужас мунны, кытысь сійӧ отсӧгсӧ кужас корсьны? Вӧлі нин эськӧн кольӧм воясӧ нывбабалы отсӧг сетысьыс, да оз на вӧлі коми аньыс тӧд сійӧс. Женотделъясыд ӧд важӧнкодь нин миян Обласьтын эмӧсь, а коми бабаясыд муртса на ӧні пондӧмаӧсь тӧдмасьны накӧд.
Ми чайтам, пондӧмаӧсь кӧ тӧдмасьны — тӧдмасясны бура, ёна. Женотделъяс велӧдасны коми аньясӧс дорйысьны, мортӧ асьнысӧ пуктыны.
Емдінын.
Женотделӧ нывбабаясыд мукӧддырйи 70 верст сайсянь волӧны. 2 тӧлысьӧн — 30 заявленньӧ вӧлӧма нывбабасянь. Коді мый вылӧ норасьӧ: ӧтикӧс мужикыс нартитӧ, мӧдлы — му оз сетны, коймӧд — юксьӧ. Унджыкыс — мужикъяс вылӧ норасьӧ: эновтӧма, кага кольӧма — вердны нинӧмӧн, колӧ перйыны вердӧм вылӧ батьыслысь сьӧм. Женотделыд — сійӧ быд туй тӧдӧ. Ӧтикӧс Земельнӧй комиссияӧ ыстас, мӧдӧс — Исполкомӧ, унджыксӧ — Нарсудӧ.
Ставсӧ висьталас — кыдз-мый колӧ вӧчны; кутшӧм кабала колӧ гижны — гижыштас. Ковмас кӧ — бабатӧ дорйыны ачыс на котӧртас заведующӧйыс — Исполкомад и Судад, быдлаын тӧдӧны Женотделтӧ. Сійӧ бара кужас сёрнитныд баба пыддиыд!
Оз нин сӧмын норасьны бабаясыд.
Емдінад ёна бура пондісны делегаткаяс уджавны. Собранньӧыд быд вӧскресенньӧӧ мунӧ. Быдтор йылысь собранньӧ вылад сёрнитасны. Кыдз-мый паськыд му вылас да коми муас олӧмыс мунӧ. Ӧткымын делегаткаыс вель сюсь нин ӧні лоӧма. Мужикыдлы ӧні оз нин сетчы — асьсӧ дорйыны кужас нин.
Сёрниыд сёрниӧн — уджалӧны делегаткаясыд, овмӧснысӧ кыпӧдӧны. Медвойдӧр ассьыныс кокньӧдӧны — выль пӧлӧс шабді кудель вӧчан кӧлуй судзӧдӧмаӧсь.
Водзӧ, ме чайта, Емдінса нывбабаыд Женотделыдкӧд ӧтвылысь уна бур на тӧдмалас, уна бур на деревняад вӧчас.
Талун тырмылас, мӧдысь видзӧдлам, кутшӧма нин овлӧны нывбабаясыс Кулӧмдін карулын.
Коми аньтӧ радейтысь.
