ТЭРМАСЬӦЙ, ДОНСЯЛӦЙ!

Юль 25-ӧд лунсянь Крестьянскӧй заёмлӧн чӧлкӧвӧя билетъяс кутасны вузассьыны 90 урӧн, бара содӧ 2 ур. Доныс вермас на водзӧ кыптыны.

Тэрмасьӧй, коми крестьяна, ӧдйӧнджык — ньӧбалӧй Крестьянскӧй заёмлысь билетъяс!

Оз ков кыдзсюрӧ думайтны тайӧ заём йылысь. Тайӧ шусьӧ Крестьянскӧй. Сідзкӧ, став сьӧмыс таысь мунас крестьяналы пӧльза вылӧ. Весиг ӧні нин тайӧ сетӧ ыджыд бур. Регыд ковмас мынтыны сельскокӧзяйственнӧй налог, позьӧ мынтыны заём билетъясӧн — босьтӧны сэки тыр донӧн.

Сэсся сентябр 1-й лунӧ кутасны пудъявны тайӧ заёмсӧ. Вермас воны билет вылас уна сьӧм. Ӧти билетыс вермас воны куимысь — 1926 воӧдз.

Локтан восянь, февральсянь, кутас воны 5 ур быд шайт вылӧ (5 прӧчент).

Киын билет видзӧмысь бара жӧ некутшӧм убытка оз ло. Прӧчентыс пыр кутас воны. Пудъялігӧн кӧ билет вылас оз усь воӧмыс (выигрыш), государство билетъяссӧ бӧр вештас тыр донӧн.

Зэв бур тайӧ заёмыд крестьяналы.

Сӧмын колӧ тэрмасьны ньӧбавны билетъяссӧ, мед спекулянтъяс киӧ оз сюрны, мед ёнджыка разалӧ крестьяна костын.