ЭГӦ ВУНӦДӦЙ!

Таво юль тӧлысьын тырӧ дас во война пансьӧмлы. Уна вир киссис уджалысь йӧзлӧн. Уна крестьяна да рабочӧй йӧз юрнысӧ ассьыныс пуктісны... Ёна пазаліс овмӧсыс йӧзлӧн война дырйи. Гӧльмисны ёна дзонь государствояс. Уна курыд синва киссис нывбабалӧн.

Йӧз курыд синва вылас, ыджыд шог вылас кинысӧ шонтісны война панысьяс. Ӧні уджалысь йӧз тӧдӧны: война панлісны озыр йӧз. Налы колӧ вӧлі писькӧдны туй асланыс капиталъяслы. Колӧ вӧлі корсьны выль муяс тӧваръяснысӧ инавны. Косьыс муніс гырысь ён государствояс костын. Косьыс колӧ вӧлі гырысь озыр йӧзлы. Гӧль йӧзыслы, уджалысь йӧзыслы шог кындзи, синваыс кындзи нинӧм эз ло войнасьыс.

Муртса на заводитӧны садьмыны йӧзыс важ пемыд войяссьыс. Муртса на заводитӧны ньӧжйӧникӧн лэптыны овмӧссӧ. Заводитӧны кокньыда, паськыда лолавны. Ланьтӧны, шойччӧны... Мӧд уджӧ босьтчӧны... Садьмӧм йӧз асьнысӧ мездӧмӧ босьтчӧны.

Уджалысь йӧз тадзи ланьтӧмаӧсь, шойччӧны. Оз бара шойччыны буржуйясыд! Мыйысь нӧ найӧ шойччасны? Кутшӧм мудзысь? Абу на, тыдалӧ, налӧн горшъясыс тырӧма. Абу на пӧтӧмаӧсь морт вир-яйнад... Выль косьяс вӧтӧн и вемӧсӧн аддзӧны. Выль кось вылӧ лэптӧны государствояссӧ мӧда-мӧд вылас. Оз дугдывны, заптӧны война кежлӧ быдсяматор. Быд государствоын заводъяс вӧчӧны морт виан оруддьӧ, снарад, газъяс. Озыр йӧз дор олысь велӧдчӧм йӧз корсялӧны-думайтӧны, кыдз эськӧ велӧдчыны йӧзтӧ ӧдйӧджык, кокньыдджыка виавны. Удж пуӧ буржуйяслӧн... Мед пуас! Эз на вунӧдны ставмувывса уджалысь йӧз важ косьяссӧ. Эз на вунӧдны, кыдз найӧ шойяс кузя озыр йӧз восьлалісны водзӧ — корсьны аслыныс ещӧ ыджыд озырлун.

Дас во войналы тыригӧн ставмувывса уджалысь йӧзыс петасны уличӧ. Медбӧръяысь, чорыда шуасны: «Тырмас ылӧдлыны миянӧс! Ми ӧні тӧдам, коді мыжа важ войнаысь. Ми ӧні тӧдам, коді кисьтіс миянлысь вирнымӧс, синванымӧс, коді пазӧдіс овмӧснымӧс. Оз ков миянлы тіян войнаыд! Онӧ ылӧдӧй! Ми тӧдам: тіян матын пом. Тіян война пыдди ми панам революция!» Мед ӧдйӧ кыптас, паськалас ставмувыв революция!