ТЫРМАС

Попъяс ёна повзьӧдлӧны пемыд йӧзӧс быдсяма грекъясӧн. Ёна ыджыд грек пӧ, шуӧны найӧ, вичкоын венчайтчытӧг гӧтрасьӧмысь. Страсьт полӧны веруйтысь йӧз сэтшӧм «грекысь.» Сы понда гӧтрасигӧн венчайтчӧмысь поплы нуӧны медбӧръя грӧшъяссӧ. Попъяс висьтавлӧны сідзи дзик сӧмын зепъяссӧ тыртӧм кузя. Асьныс оз повны некутшӧм грекысь, сӧмын ылӧдлӧны пемыд йӧзӧс.

Со кыдзи попъясыд олӧны асьныс. Сернӧсын (Черныш) поп Мысов пыр код, вӧтлысьӧ йӧз бабаяс бӧрся, олӧ аслас прислугаыскӧд венчайтчытӧг, венчайтчыны лоӧма сӧмын кор веруйтысьясыс пондӧмаӧсь видны да янӧдны. Ӧнія гӧтырлысь, кодкӧд олӧма венчайтчытӧгыс, веруйтысьясыс шуӧны, виӧма пӧ кага рӧдсӧ.

Со кыдзи попъясыд олӧны.

Мый сэсся не овны! Госыс весь олӧмсьыс гильӧдӧ, кытчӧкӧ сійӧс колӧ воштыны, да и зептыс тыр — тырмӧ быдлаӧ: пьянствуйтны, развратничайтны и мукӧдлаӧ. Сернӧсса поп веськыда грабитӧ йӧзтӧ: ӧти морт дзебӧмысь босьтӧ 15 пуд сюӧн да быдса мӧскӧн, а мукӧд доходыс мыйта нӧшта!

Уджалысь морт кӧ кӧсйӧ аслас пемыдысь петны, поп сылы медводдза дзугысь. Сернӧсын 20-ӧд лунӧ май тӧлысьын крестьяна чукӧртчӧмаӧсь сёрнитны видз-му уджалӧм кыпӧдӧм йылысь. Сэтчӧ воӧма поп, пондӧма дзугны, сӧмын абу вермӧма, собранньӧ вывсьыс вӧтлӧмаӧсь.

Коми йӧз, ӧдйӧнджык восьтӧй синъястӧ, аддзӧ попъяслысь ылӧдлӧмсӧ! Онӧ ӧмӧй аддзӧ: тіянӧс повзьӧдлӧны грекӧн да адӧн, а асьныс медлёка олӧны. Сы кузя быд вӧлӧсьтын 1000 шайтъясӧн быд воӧ налы шыблалад, биӧ моз. Оз-ӧ ло бурджык сійӧ сьӧмъяссӧ видзны видз-му уджалан машинаяс вылӧ, кокньӧдыштны ассьыныд сир курыд олӧмтӧ. Думыштӧ та йылысь да шуӧ дась нянь сёйысьяслы — ТЫРМАС!

В. М.