МЫЙ ШУИС КОМИ КООПЕРАТИВНӦЙ СЪЕЗД
Маегов доклад серти
Ми, делегатъяс кооперацияясысь, тайӧ чукӧртчылӧмӧн кывзім миян Сӧвет Республикалысь пытшкӧс йӧзкостса олӧм.
Тайӧ во вуджигӧн мувыв буржуйяс кутлісны пестыны война Сӧвет Республикаяс вылӧ: сӧмын налӧн лёклуныс разалі миян мирнӧй, тӧлка политикаӧ, миян повзьытӧмӧ, Сӧвет Республикаяс ёнлунӧ. Буржуйяслысь пӧсьлунсӧ кӧдзӧдіс и мувыв уджалысь йӧз, мувыв пролетариат.
Коммунист партия бур веськӧдлӧмӧн Сӧвет Республика лӧсьыда петіс быдпӧлӧс буржуйскӧй угрозаясысь; миян крепыд-чорыдлун вӧсна заграничнӧй буржуазиялы угрозаяс места лои признайтны Сӧвет Республикаяс. Договоръяс Англиякӧд, Италиякӧд, Швециякӧд, Китайкӧд и мукӧд государствояскӧд петкӧдлӧ, мый Сӧвет Республика воысь воӧ ёнмӧ, кыптӧ мукӧд йӧз костын, мый политика Сӧвет власьтлӧн мунӧ Владимир Ильич тшӧктӧм серти, мый Владимир Ильичтӧг таво коммунист партия кужис нуӧдны Сӧветъясӧс Ленин туйӧд, лэптіс и ёнмӧдіс миянлысь пролетарскӧй Государство. Сэтшӧм политика ми дзоньнас шуам лӧсьыдӧн.
Сӧвет Республикаяс пытшкын олӧм таво тӧдчӧмӧн вежсис и чегсис бурланьӧ, овмӧс фабричнӧй и крестьянскӧй кыптіс, паськаліс сідзжӧ тӧдчӧмӧн.
Кутшӧм удж таво нуӧдіс Сӧветскӧй Правительство Республика пытшкын: выль деньга лӧсьӧдӧмӧн, тӧвар донтӧммӧдӧмӧн, нянь заграничаӧ вузалӧмӧн, крестьянстволы кредит восьтӧмӧн, заводъяс лэптӧмӧн и мукӧд пӧлӧс уджӧн — сійӧн ёна кокньӧдіс уджалысьясыслысь олӧм, ёнмӧдіс йитӧд — «смычка» фабричнӧй овмӧс и крестьянскӧй овмӧс кост, кыдз шуліс и туйдӧдліс Владимир Ильич Ленин.
Ми аддзам, мый Сӧвет Республикаяс пытшкӧс олӧм таво мунӧ Ленин тшӧктӧм ногӧн, Коммунист партия нуӧдӧмӧн.
Мый шуис Коммунист партия 13-ӧд съезд вылын водзӧ кежлӧ вӧчны, ми дзоньнас босьтчам нуӧдны, медся ёна кооперация ёнмӧдны и венны частнӧй тӧргашъясӧс ростовщикъяскӧд, сідзжӧ кыпӧдны культура деревняын изба-читальняяс пыр и велӧдӧм, туйдӧдӧм пыр, отсӧг сетӧмӧн культурнӧй удж вылӧ. Сійӧ уджсӧ ми лыддям медводдза, медыджыд уджӧн крестьянство пытшкын.
Чолӧм Ленинскӧй чорыд Коммунист партиялы, ставӧн тшӧтш сыкӧд мунам водзӧ Ленин петкӧдлӧм индалӧм туйясӧд!
Чолӧм V Конгресс Коммунистическӧй Гӧрд Интернационаллы!
