СТАВМУВЫВСА КООПЕРАТИВЛӦН ӦТУВТЧАН ЛУН

Быдлаын, став йӧзыс талун кутасны празднуйтны Ставмувывса кооперативлысь ӧтувтчӧмсӧ. Мыйла нӧ тайӧ праздниксӧ лӧсьӧдӧма? Та йылысь висьтавны позяс сӧмын сэк, кор ми кутам тӧдны, мый лоӧ кооперативыс, мый сійӧ вӧчӧ, мыйла сійӧс лӧсьӧдӧма.

Кооператив шуӧ: «Ӧтувтчӧмын — ыджыд вын». Мый оз вермы крестьянин вӧчны ӧтнас, вермас вӧчны ӧтувтчӧмӧн — кооперативӧн. Ӧтувтчӧмӧн ньӧбасьны кӧть вузасьны — лӧсьыдджык.

Торйӧн вузасигад спекулянтъяс дорӧ лоӧ мунны — найӧ веськыда орӧдӧны крестьянинтӧ. Босьтам бара ньӧбасьӧмтӧ: ӧтнад ньӧбан этша. Этшатӧ вузалӧны донӧнджык. Ӧтув ньӧбасигӧн ньӧбан уна (оптом). Унасӧ сетӧны донтӧгджык.

Крестьянинлы колӧ уджалан кӧлуй, быдсяма кӧйдыс; кыдз сійӧс ньӧбас миян гӧль крестьяниныс ӧтнас? — Дерт жӧ, оз вермы. Колӧ ньӧбны ӧтув — чукӧрӧн. Сідзи кокньыдджык.

Кӧзяйствояс омӧльтчӧмаӧсь. Кыдзи сійӧс лӧсьӧдан, бурмӧдан? Бара жӧ — ӧтувтчӧмӧн, артельӧн. Со мый вӧсна став кооперативыс ӧтлаасьӧны Ставроссияса союзӧ. Та вӧсна жӧ ӧтувтчӧны став государствоса кооперативъясыс.

Миян сӧветскӧй кооператив ассьыныс олӧмсӧ лӧсьӧдіс бура. Сэтшӧма лӧсьӧдіс, ӧні сійӧс лыддьӧны медбурӧн став мукӧд государствоса кооперативъяс сертиыс.

Эм на миян уна лёк кооперативъяс. Оз вермыны крестьянинлы сетны некутшӧм буртор. Эмӧсь кооперативъяс озыр йӧз киын. Уна деревняын на абу некутшӧм кооператив.

Мед тайӧ ставсӧ лӧсьӧдны, бурмӧдны гӧль йӧзлысь олӧмсӧ, лӧсьӧдӧма талунъя праздниксӧ.

Тайӧ праздникыс уджалысь йӧзлӧн — рабочӧйлӧн да крестьянаяслӧн. Кооперативӧ пырӧны, гижсьӧны сӧмын уджалысь йӧз.

Тайӧ праздникыс абу вичкоса праздник, кор поп-дякъяс бур йӧзсӧ ылӧдлӧны, мӧдаръюгыдысь бур олӧм висьталӧны.

Тайӧ праздникыс йӧзӧс ӧтувтӧ бура овны, олӧм-вылӧмсӧ лӧсьӧдны.

Дугдӧй, вокъяс, важ ногнад гажӧдчыны, петӧй талун асланыд кооператив праздник вылӧ!

Энӧ вунӧдӧй Ленинлысь тшӧктӧмсӧ: «Кооперативӧн овны крестьяналы медбур».

М. Торлопов.