ЛЕНИН ДА КООПЕРАТИВ

Миян Сӧветскӧй власьт смела мунӧ водзӧ, лӧсьӧдӧ ассьыс олӧмсӧ; дугдывтӧг содӧ пабрик-заводса тӧвар, паськалӧ видз-му, лӧсьӧдӧма кӧрт туйӧд ветлӧм.

Миян олӧмыд ӧні сэтшӧма бурмис, со вермим нин лӧсьӧдны дон усьтӧм деньга. Веськыда кӧ шуны, Сӧветскӧй власьтыдлӧн олӧмыс быд воӧн бурмӧ. А мӧдарӧ кӧ шуны: унатор на колӧ миян вӧчны.

Уна служащӧй, крестьянин оз на кужны кыдз колӧ овнысӧ, уна на лишнӧй деньга мынтӧны вӧльнӧй тӧргӧвӧйяслы. Найӧ ӧд олӧны барыш вылӧ.

Пабрик-заводса тӧвар ӧні неуна донтӧммис; миян крестьянскӧй тӧвар серти вывті нин донтӧммис. Уна йӧз на ещӧ мынтӧны унатор вылӧ лишнӧй дон, унатор на вузалӧны донтӧм донысь спекулянтъяслы. Талы колӧ пуктыны пом.

Колӧ лӧсьӧдны сідз, мед вӧлі крестьянинлӧн уджыс вештыссьӧ. Сійӧ вермас лоны, кор бырӧдам вӧльнӧй купечьясӧс да бура лӧсьӧдам кооперативъяс. Мед бурмас олӧмыс став йӧзыслӧн, колӧ ӧтувтны рабочӧйясӧс да крестьянинӧс, кыдзи тшӧктіс Ленин.

Кор вӧлі ловъя миян коммунист батьным, сійӧ унаысь висьтавліс кооператив йылысь. «Кооператив нуӧдӧ социализмӧ», — шуис Ленин; «Сӧмын кооператив вермас бурмӧдны миянлысь олӧм», — шуліс сійӧ.

Ленин шуліс: «Мед лоас быд крестьянин членын кооперативын; мед ӧтувтчӧны крестьяна кооперативӧ».

Колӧ бура, мый эм выныд, лӧсьӧдны кооператив, — комиӧн кӧ шуны — ӧтувъя олӧм.

Кооперативӧ оз ков лэдзны озыръясӧс, сэтчӧ колӧ лэдзны сӧмын гӧльясӧс да код Сӧвет власьт дор сулалӧ.

Колӧ гӧльяслы лӧсьӧдны сідзи, мед некор кооператив правленньӧӧ оз пырны озыр йӧз. Гӧльяслы колӧ аслыныс бурыс, сідзкӧ мед асьныс и кутӧны ас киас кооперативсӧ.

Коми йӧз, пырӧй, гижсьӧй кооперативӧ, ӧтувтчӧй уджавнытӧ, Ленин тадзи тшӧктіс.

Сӧвет власьт, коммунист партия, мый эм выныс, кутасны отсавны кооперативлы.

Крестьянин, бур мортӧн кӧ лыддьывлін Ленинӧс — пыр, гижсьы кооперативӧ!

М. Торлопов.