ӦТУВТЧӦМЫН — УНДЖЫК ВЫН

Ёртӧ!

Юав ассьыд талунъя лунӧ — кооперативӧ гижсьӧмыд абу тэ? Ӧнӧдз на кӧ тэ та йылысь эн мӧвпыштлыв, пырысь‐пыр жӧ гижсьы аслад вӧлӧсьтса кооперативад.

Гижсьылін кӧ нин важӧн кооперативад да мынтылін пайтӧ — юав ассьыд талун: ёна-ӧ уджалан асланыд кооперативад, кымын мортӧс сюйин (пыртін) кооперативад, тӧдсаясыд, суседыд, рӧдняыд пыралӧмаӧсь абу на кооперативӧ, мый тэ вӧчин, мед найӧ тшӧтш пырисны кооперативӧ? Та йылысь, коми мортӧй, колӧ мӧвпыштлыны бура тэныд, быд уджалысь мортлы СССР-ын колӧ та йылысь мӧвпыштны. Ті кӧ кутад уджавны, зільны кооперативтӧ ловзьӧдны — кооператив лоӧ ён, озыр, бура кутас уджавны; ті кӧ кутад бокисянь видзӧдны — кооператив лоӧ слаб, лёк, гӧль, некутшӧм тӧдчымӧн пӧльза оз вай.

Пыр кооперативӧ да содты вынсӧ сылысь, аслыд жӧ бур лоас. Эн вунӧд Ленинлысь тшӧктӧм-индӧм, кооператив пыр кар да сиктъяс мӧда-мӧдлы отсасьӧны (смычка). Колӧ сійӧ отсасьӧмсӧ кыпӧдны, ловзьӧдны.

Ыджыд юяс артмӧны посни шоръясысь — ён кооператив артмӧ пуктысьӧмӧн; ті гижсяд кооперативӧ, пуктысяд (мынтад пыригад пай) — артмас ён кооператив! Ньӧбасян кӧ купечлысь — гӧльмӧдан асьтӧ, озырмӧдан купечӧс, лёк вӧчан Сӧветскӧй власьтлы.

Талун, Ставмувывса Кооперативъяслӧн ӧтувтчан лунӧ, коді эз на пыр, пырӧй асланыд кооперативӧ.

Талунъя лунӧ бурсиам:

Мед вермас кооператив купечӧс!

Купечлы — пом, кооператив, ловзьы, ёнмы!