КӦСЙӦНЫ ВЕЖНЫ ВАЖНОГСА ВИДЗ-МУ УДЖАЛӦМ ВЫЛЬ ВЫЛӦ

Таво май 20-ӧд лунӧ Сернӧсын (Черныш) крестьяна чукӧртчылісны ӧтлаӧ сёрнитны видз-му уджалӧм кыпӧдӧм йылысь.

Ставӧн висьтасисны сьӧлӧмсьыс мӧда-мӧдлы, кыдзи‐мый бурджыка пуктыны видз-му уджаланногсӧ. Бӧрыннас воисны ӧти кывйӧ, ӧтвылысь шуисны ставӧн: ӧнія куим ыба (воысь воӧ пыр ӧти пӧлӧс кӧдзана — коськӧм, сю, ид) уджаланногсӧ пӧ колӧ шыбитны, уналаса торъя ыбъяс ӧтлаавны, кутчысьны кӧдзны му вылӧ няньысь ӧприч турун, пуктыны картупель, галан, мукӧдтор. Та вӧсна вӧчны медводз землеустройство. Татшӧм индӧмъяс кӧсйысьӧмъяс ёна буртор. Мед эз жӧ эськӧ коль сійӧ индӧм кежсьыс да кӧсйысьӧм кежсьыс кабала вылын. Сы вӧсна Сернӧссалы ставлы колӧ босьтчыны ӧтвылысь, ӧти морт моз, вӧчны тайӧ асланыс шуӧм серти. Дзугысьяс вылӧ оз ков видзӧдны.

Агрономъяслы да земорганъяслы колӧ отсавны. Сернӧсын колӧ пуктыны видз-му уджалӧм мукӧд вӧлӧсьтъяслы пример вылӧ. Условйӧясыс сы вылӧ сэні эмджык мукӧд вӧлӧсьтъяс серти.

Босьтчӧй, Сернӧсса, сьӧлӧмсьыд вӧчны татшӧм бурторсӧ ставӧн ӧтвылысь, ӧти морт моз.

Агрономъяс, земорганъяс, отсалӧй!

Ветлысь-мунысь.