КОЛӦ ОРӦДНЫ ВУЖСЯНЬЫС

Шоч номерын газетын оз гижны самӧкур йылысь. Чиныштӧ оз бара самӧкур юӧмыс-а?

Ме чайта, гижысьясыс ӧтар боксянь сӧмын видзӧдӧны юӧм вылас. Век ӧтарӧ гижӧны самӧкур йылысь, самӧкур пуысьяслы ыджыд мыждӧм мыччӧны. Некод тай нӧ мыйкӧ оз гиж юысьяс йывсьыс. Ме тай кывлывла, ёна пӧ самӧкур Сыктывкарӧ вайӧны вузалӧм вылӧ. Сідзкӧ нӧ Сыктывкарын эмӧсь самӧкур ньӧбысьяс? Эмӧсь кӧ сэтшӧмъяс, дерт жӧ, кӧнкӧ, Сӧвет удж нуӧданінъясын уджалысьяс, велӧдчӧм, бур вежӧра войтыр. Код юра войтыр сы сы вылӧ ветлӧны карын... Судӧ сетӧм юӧмысь мыйкӧ оз кывсьывлы. Буракӧ, декретыс юысьяс йывсьыс нинӧм абу шуӧма, сӧмын вина пуысьясӧс мыждыны шуӧма.

Ме ногӧн, вина юӧм вылӧ колӧ кык боксянь видзӧдлыны: мыждыны пуысьсӧ и юысьсӧ.

Пемыд коми войтырӧс саръяс велӧдлӧмаӧсь гажсӧ да сьӧкыд уджсьыс шойччӧгсӧ корсьны вина помысь. Олӧмыс налӧн омӧля на вежсис: пемыдӧсь, ныр вылас усьтӧдз уджалӧны — асшӧр пуӧм винаысь важ моз на корсьӧны шойччӧг да гаж.

А велӧдчӧм, бур вежӧра войтырыс нӧ эськӧ мый понда ньӧбӧ пемыд мужикыслысь самӧкурсӧ да усьтӧдзыс юӧ?

Коми мужикыд ӧд аддзӧ олӧмтӧ, сыысь сійӧс он дзеб... Сійӧ вот и мӧвпалӧ: «Ме пӧ слӧта-вода песся, ныр вылӧ усьтӧдз уджала, пуа пӧ самӧкуртор аслым — менӧ судӧ кыскӧны, овмӧс, керка-карта мырддьӧны семьялысь, ачымӧс йӧртӧны Исправдомӧ. Сӧветскӧй служащӧйяс пӧ кокньыда кынӧмпӧтсӧ перйӧны, сьӧм нажӧвитӧны, дась пуӧм вина юӧны — найӧс некод оз мыжды». Лёкмӧдӧ, дӧзмӧдӧ сійӧ коми крестьянинтӧ.

Ме ногӧн кӧ, юӧмыдкӧд вермасьны колӧ босьтчыны вылісянь: карсянь, велӧдчӧм войтырсянь. Кор карын эз юлыны, сэки и сиктъясын юӧм бырлі. Сыктывкарсӧ медвойдӧр колӧ весавны юӧмсьыс. Этшаджык сёрнитны та йылысь, унджык вӧчны. Сёрнинад юӧмыд оз чин.

П. М.