ЛАЧА

Ыджыд коми гижысь Вениамин Тимофеевич Чисталёвлы (Тима Веньлы) сиӧмӧн

1

«Видза олан, гажа нӧрыс —

Пожӧм дзуа Помӧс бок *.

Метӧг уличын и йӧрын

Мед оз ветлы эськӧ шог.

* Помӧс бок — Помӧсдін сикт дорын Помӧс ю бок.

Медся бур ӧд, морт кӧ сьылӧ,

Кутӧ вылын ассьыс юр.

Менӧ йӧткыштісны ылӧ,

Кодъяслыкӧ эг ло бур.

Вылыс Човйыд * — Коми му жӧ,

Но оз овсьы тані, оз.

Таса ӧдзӧссӧ он чужйы

Да он лэбзьы бордъя моз.

* Вылыс Чов — Сыктывкар сайын дзескыдін, кӧні пукавліс Тима Вень, эм и ӧні.

Видза оланныд, бур йӧзӧй,

Ог тай сёрнинытӧ кыв.

Эм жӧ тані енэж лӧзыс,

Сӧмын сьӧлӧмӧй оз сьыв.

Овны ылісянь ог велӧд,

Но и шутӧгыс ог ов:

Водзӧ югыдланьыс келӧй,

Велӧдчытӧг пемыд лов.

Челядь — миян водзӧ олӧм,

Налысь югдӧдӧй ті юр.

Ӧта-мӧдлы нэмсӧ колӧй,

Сэки ставыс лоас бур.

Видза олан, муса Ара *,

Медся дона менам морт.

Гажтӧм менӧ босьтіс бара,

Ок и ёна жаль мен горт.

* Ара — тадзи шуліс Тима Вень гӧтырсӧ — Александра Семёновнаӧс.

Синва сорӧн, кӧнкӧ, олан,

Тӧда: ёна сьӧкыд тэд.

Месӧ татысь кор на вола,

Некод вочакыв оз сет.

Нинӧмабусьыс ӧд сюйис

Менӧ татчӧ торксьӧм лун.

Муні власьтӧн индӧм туйӧд,

Гуся ордымӧд эг мун.

Некор некодлы эг шулы,

Медым юксис Коми му

Да эз ов роч кабыр улын,

Дзикӧдз вошты коми ру.

Шулі сӧмын, мися, колӧ

Коми вӧсна бурджык тӧжд,

Медым кыпыдджыка оліс,

Шогсӧ ӧтарӧ эз пӧж.

Йӧзсӧ чуксалі, мед быдӧн

Вӧлі уджын би да борд,

Медым содім лолӧн-лыдӧн,

Няньӧн-солӧн кутім горт.

Сьӧдас олӧм — абу олӧм,

Сэки радлунтӧ он тӧд,

Сэки шудаӧн он лолы

Да и кынӧмыд оз пӧт.

Ме серти кӧ, луныс пуксьӧ,

Медым нимкодясис морт.

Шудыд уна пельӧ юксьӧ,

Сылӧн медся кокни борд.

Коми мортлӧн, кыдзи-й рочлӧн,

Вежӧр тырмӧ да оз ям.

Абу яндзим некод водзын —

Быдтор вылӧ тырмӧ сям.

Сылысь кисӧ кӧ он кӧртав,

Сылысь вомсӧ кӧ он вур,

Чужан мусӧ садйӧ пӧртас,

Сэні лоас ставыс бур.

Некыдз Трипан Васьӧй* менам

Абу бӧрӧ кыскысь морт.

Сійӧ сьӧкыдлунъяс венӧ,

Кутӧ олан руӧн горт.

* «Трипан Вась» — Тима Веньлӧн висьт, кодӧс донъялісны «мелкобуржуазнӧйӧн».

Сійӧ овмӧс вӧсна тӧжда,

Зільӧ, ставыс вӧлі мед.

Ачыс аслыс чӧжӧ кӧшта,

Йӧзлысь гусявны оз пет.

Сійӧ — олӧмыслӧн сюрӧс,

Керкаяслӧн подув кер.

Буретш сыкӧд лоас бурыс,

Югдас олӧмыслӧн сер.

Ог жӧ ошкы сэтшӧм мортӧс,

Кодлӧн гортын кулӧ шыр,

Кор страналӧн медбур ёртыс —

Коді гӧрӧ, бертӧ мыр?

Но да, ладнӧ. Чайта, воас

Менӧ шогысь мездан лун.

Тадзи лоас, бытьысь лоас,

Эг ӧд, кӧнкӧ, дзикӧдз вун.

Сідзсӧ чорыда нин вися,

Абу олысь ёна дыр.

А ӧд чайтлі коркӧ: мися,

Сёӧдз подулас ог пыр.

Гортын метӧг дзольгӧ ёльыс,

Метӧг ӧзйӧ пелысь чаль.

Ставыс метӧг сэні колис,

Вӧчтӧм керка медся жаль.

Ыджыд керка сад кодь йӧрын...

Ме ӧд, думысь, вӧчи поз,

Медым уна гижысь тӧрис,

Сэні оліс гортас моз.

Медтӧ эськӧ воліс Савин *,

Сандрик Микол **, Изъюр Вань ***...

Воліс быдӧн, тӧрим ставӧн,

Тырмис вӧлӧга и нянь.

* Савин — коми гижысь Виктор Алексеевич Савин (Нёбдінса Виттор).

** Сандрик Микол — коми гижысь Николай Александрович Шахов.

*** Изъюр Вань — коми гижысь Иван Васильевич Изъюров.

Татысь мыйӧн коркӧ мына,

Керка бердӧ-й босьтча пыр.

Меным вӧля содтас вынӧс,

Шудыс лоӧ сьӧлӧм тыр.

Менам локтӧдз кыдзкӧ ов на,

Кыдзкӧ челядьтӧ вай видз.

Эн жӧ усь тэ, Ара, ловнад,

Локта мыйӧн, лоас лич.

Отсасьыштӧ, кӧнкӧ, Авъя *,

Джоджтӧ мыськыштӧ да мый.

Сійӧ збыльысь миян авъя,

Рудзӧг няньным вылӧ вый.

* Авъя — Тима Веньлӧн Авиа нылыс.

Чайта, отсасьӧ и Муза *,

Сійӧ миян зэв жӧ зіль.

Помся мыйкӧ вӧчӧ-нузӧ,

Синсӧ бӧрдӧмысь оз тіль.

* Муза — Тима Веньлӧн ныв.

Зэв на дзоля миян Вокан *

Да, дерт, нинӧмсӧ оз куж.

Но ӧд коркӧ Эжва бокын

Сійӧ на и содтас вуж.

* Вокан — Тима Веньлӧн пи.

Кутчысь кыдзкӧ, кутчысь, Ара,

Кӧть и кушмис овмӧс куд.

Аслым нинӧмсӧ ог гарав,

Кыдзкӧ челядьнымӧс кут.

Кыдз нӧ сиктным олӧ-вылӧ?

Гажыс овлӧ али оз?

Оз кӧ кыв ӧд гажа сьылӧм,

Сьӧлӧм сукарысь на кос.

«Ныв сетӧмӧй» * гажа вӧлі,

Ӧні сылы, дерт жӧ, тас.

Менам гижӧд, менам гӧлӧс

Чужан муын эз ло ас.

* «Ныв сетӧм» — Тима Веньлӧн пьеса, код серти пуктылісны спектакль.

Коми мортлӧн коми горӧн

Воссьӧ-кыпыдалӧ лов.

Сійӧс узьтӧдлыны дорын,

Видны, бӧрддзӧдны оз ков.

Мыла кывйысь, кыпыд руысь

Эськӧ некод мед эз кут.

Мортлы сӧмын чужан муысь

Сюрӧ, да-й оз век на, шуд.

Кыдзи сэні менам ниа? *

Чайта, кутчысяс, оз пӧр.

Али мелӧн моз жӧ йиа

Сылӧн зумыд сьӧлӧм шӧр?

* Менам ниа — ӧшинь улын быдмысь ниа пу.

Пожӧм тільсӧ школа дорысь

Челядь лелькуйтӧны мед.

Садтӧг-йӧртӧг мортыд корысь,

Сытӧг шудыс оз и шед.

Вӧрас-ваас зыкӧн олам,

Дзужгӧ пила, камгӧ чер.

Лӧньӧдчыштны эськӧ колӧ,

Мед эз быгав парма сер.

Ӧдлы, гижи бура уна,

Ачыс петіс — кыв да мӧд.

Мыйкӧ пасйи, мыйкӧ вуніс,

Мыйкӧ югыд, мыйкӧ сьӧд.

Бӧръяпомыс тадзи шуа,

Кӧть и метӧг тӧдса тэд:

Мыйкӧ ковмас — йӧзлысь юав,

Эм кӧ аслад — налы сет.

Сӧмын ӧтув шогсӧ венан,

Сӧмын ӧтув аддзан шуд.

Тадзи чайтӧ тэнад Веня,

Тайӧс тӧд вылад век кут.

Ме бур йӧзыслы и гижа,

Быттьӧ пӧтка, ӧкта тусь,

Кытчӧдз корйыс моз ог вижӧд

Да кын дорыш вылас усь.

Эска: гортын лоа бара,

Аддза ассьым ю и му.

Аддзысьлытӧдз, муса Ара,

Ог на «прӧщайтлысӧ» шу».

2

«Муса Веня, видза олан,

Гижа тэныд гоз-мӧд кыв.

Бӧрти ачым бытьысь вола,

Шондӧдас кор ывлавыв.

Митӧ сьӧкыда, но олам,

Кыдзкӧ-мыйкӧ кольӧ лун.

Бӧрдла, но эг усь на лолӧн,

Ог на йӧзӧ корны мун.

Отсалӧны рӧдным-вужным,

Отсалӧны шань, бур йӧз.

Вермим тӧвсӧ кыдзкӧ вуджны,

Эз на кынты миянӧс.

Миян вӧсна тэ эн шогсьы,

Сьӧлӧмтӧ эн дзикӧдз ви.

Вотлім ягсер Помӧс боксьыс,

Эмышт картупельыд и.

Кыдзкӧ олам, керка шоныд,

Век на эмышт воддза пес.

Зэв на-й буретш гортын лоны,

Медтӧ тэнад мынас вез.

Ме ӧд тӧда: абу мыжа,

Нинӧм лёксӧ тэ эн вӧч.

Няньӧн катіс тэнад пыжыд,

Йӧрӧ тӧрича эн кӧдз.

Пемыд йӧзлы югыд нуин,

Медым вежӧр тӧдіс юр.

Лэптін овны кыпыд руӧн

Да век вылын кутны юр.

Тӧждӧн-уджӧн мунліс воыс,

Гижин-пессин лунысь-лун.

Йӧзыс сьыланкывъя лоис,

Озджык вина-сурӧ сун.

Жалитӧны найӧ тэнӧ:

Шань пӧ вӧлі Тима пи.

Кодкӧ корӧ лэдзны Енмӧс,

Кодкӧ эскӧ: югдас би.

Бурӧ эскӧмыс и кутӧ

Уджсӧ тӧдысьяслысь лов.

Ставӧн вӧдитӧны мутӧ,

Вермысь скӧттӧгыд оз ов.

Отсалӧны вӧрыс-ваыс,

Сӧмын туй да ордым тӧд.

Мед кӧ абу сэні маыс,

Сійӧн кынӧмыд оз пӧт.

Ачым тшӧтш жӧ бурас эска,

Татӧг эськӧ важӧн кын.

Талун лолӧйлы кӧ дзескыд,

Аски лоас олан вын.

Югыд кадыс синъяс водзын,

Кор на томӧсь вӧлім ми.

Тэкӧд дӧзмывлім ми шоча,

Ӧзйис сьӧлӧманым би.

Ёна жӧ и сьӧлӧм куліс,

Кор салдатын видзис кад.

Сэки тулыс эз вӧв тулыс,

Кӧть и дзоридзаліс сад.

Петіс нюмӧй сэки вӧлись,

Синъяс водзын лоин кор.

Гажа вӧлі миян кӧлысь,

Шудыс вӧлі пом ни дор.

Ёна жӧ и кыпыд лолӧн

Сэки олім тэкӧд ми.

Дӧзмылӧмыс кӧть и лоліс,

Сійӧ шуднымӧс эз ви.

Вывті ёна уджсӧ тӧдін,

Коркӧ шойччылін ли эн.

Бӧрти гӧгӧрвоны мӧді:

Ковмас миритчыны мен.

Эн ӧд асьтӧ флаг моз лэпты,

Лэптін йӧзлысь сям да лов.

Эн кӧ быттьӧ ачыд лэб тэ,

Эз и мукӧд бордйӧн ов.

Ӧні олан гажыс лӧнис,

Йӧзлӧн сьӧлӧмъясын — дой.

Йиджӧм вира кыа вӧньыс,

Волӧ лун, но быттьӧ вой.

Абу вӧлӧсьт вылын сьылан,

Быттьӧ гӧгӧр личкис ун.

Сьӧдас йӧзыс олӧ-вылӧ,

Медтӧ сӧмын колис лун.

Гашкӧ, кӧнкӧ да и гажа,

Кӧні гажа — ме ог тӧд.

Эз нин некод волы важӧн,

Оз и усьлы югыд вӧт.

Олӧм весьтын сардмӧм шалльӧн

Дорсянь помӧдз енэж от.

Кылыштӧ на кӧнкӧ чалльӧг,

Гашкӧ, сьӧлӧм дзик оз пот.

Эска ме, мый бӧр тэ воан,

Збыльыс вермас, лӧжыс — оз.

Бӧр ми шудаӧсь зэв лоам

Долыдалысь юсьяс моз.

Тӧждӧн-уджӧн водзӧ олам,

Челядь бордъясясны мед.

Чайта, кыпалам на лолӧн,

Йӧрӧ петшӧрыс оз пет.

Ыджыд керка вӧчӧм эштас,

Сэтчӧ, майбыр, тӧрам ми.

Ёна жӧ и гажа места —

Помӧсбокса пожӧм ді!

Мед и волывласны карысь,

И Москваысь тшӧтш жӧ мед.

Миян тулысысь кӧть арысь

Аддзас мичлунсӧ поэт.

Вӧрӧ-ваӧ найӧс нулан,

Вӧчлан кодарынкӧ би,

Дозмӧр шыд ли юква нулан,

Дзикӧдз шоналанныд ті.

Водзӧ лоӧ йӧзлы сьылан,

Водзӧ лоӧ шоныд кыв.

Дзик быд вӧлӧсьт бурсӧ кылас,

Сыктывдін и Эжва йыв *.

* Сыктывдін и Эжва йыв − Коми Республикалӧн юкӧнъяс-районъяс.

Сӧмын висьӧмлы эн сетчы,

Сэні тӧрасьысь оз сюр.

Олан думӧн быд лун чеччы,

Быттьӧ ставыс тэнад бур.

Быттьӧ гортысь эз и нуны,

Вылыс Човсӧ он и тӧд,

Лёктор вӧчысьӧн эз шуны,

И дзик ставыс тайӧ — вӧт.

Эскы, мый сьӧд шогсьыс мынан,

Дзескыдіныс дыр оз кут.

Кыптӧм лолӧн, содӧм вынӧн

Тэнӧ сывъялас на шуд.

Гашкӧ, шуан, челядь сёрни,

Да оз сюр тай мӧдыс мен.

Ачыд тӧдан: мыйӧн норман,

Ньӧти сьӧкыдсӧ он вен.

Тэнсьыд гӧлӧстӧ ме кыла,

Кӧть и абу талань тшын.

Век тэ орччӧн, кӧть и ылын,

Тайӧ сетӧ меным вын.

Кокни дзоляника ловлы,

Мый эм миян шоныд поз,

Челядьным оз тшыгйӧн овны,

Ворсӧны жӧ челядь моз.

Авъя гӧгӧрвоӧ ставсӧ

Да оз юась, колӧ-й-оз.

Пыртӧ гортӧ пессӧ-й-васӧ,

Ставсӧ вӧчӧ ыджыд моз.

Муза уджтӧ зэв жӧ тӧдӧ,

Дасысь висьталӧм оз ков.

Сійӧ миян визув ӧда,

Сійӧ миян бордъя лов.

Вокан — муса кага миян —

Тӧрасянтор на и эм.

Дзик ӧд тэ кодь баннас сійӧ,

Мед жӧ тӧдлас шуда нэм.

Бӧрдны чойясыс оз лэдзны,

Сійӧс ворсӧдӧны пыр.

Мыйкӧ велӧдӧны тэчны,

Налӧн гӧлӧс керка тыр.

Тайӧ-й шонтӧ менсьым лолӧс,

Эськӧ вӧлі — эн кӧть ов.

Меным ставсӧ венны колӧ,

Кут и тэ бур биӧн лов.

Ыджыд ниа пуыд ловъя,

Бушков паджліс, да эз чег.

Эска ме: и Чисталёвъяс *

Сы моз сулаласны век.

* Чисталёвъяс — Тима Веньлӧн рӧдыс-вужйыс.

Гижи тэныд бура уна,

Кытчӧдз асылыс эз кый.

Бумаг вылад сьӧкыд шуны,

Сьӧлӧм пытшкын вӧчсьӧ мый.

Йӧзсянь чолӧм содтӧд пукта,

Натӧг эськӧ сё пӧв лёк.

Кӧть он кор, а отсӧг чуктӧ,

Миян шог — и налӧн шог.

Мыйӧн шондӧдыштас — вола,

Кольла кодлыкӧ да горт.

Эн жӧ, эн жӧ усь тэ лолӧн,

Менам дона, муса морт.

Кыдзкӧ-мыйкӧ пальӧд шогтӧ,

Эска: воссяс дзескыдін.

Аддзысьлытӧдз. Виччысь. Локта.

Тэнад Ара. Помӧсдін».

3

«Видза олан, дона мортӧй,

Ыджыд гижысь Тима Вень.

Тэнад гижӧд нэмсӧ бордъя,

Мича, кыдзи енэж кень.

Вылыс Човйын тэ эн кувлы,

Пемыд гуын тэ он узь.

Тэнад лолыд шонді улын,

Быттьӧ енэж шӧрын юсь.

Нэмсӧ юргӧ сӧстӧм кывйыд,

Коді тэнад коми дзик.

Олӧ небыд, шоныд сывйын

Коми мулӧн дзик быд сикт.

Быдмин «лӧзов чӧд тусь пиын

Вӧр туй дорын» * коркӧ кад.

Шонтіс лӧня пелысь биыс,

Шӧпкис гусяторъяс вад.

* «Лӧзов чӧд тусь пиын...» — Тима Веньлӧн кывбурысь.

Вӧлі тэныд «потан пыдди

Джуджыд вӧр ты пыдӧс ва» *.

Вӧрса пӧльыс мойдъяс лыддис,

Зараваыс вӧлі ма.

* «Потан пыдди джуджыд вӧр ты пыдӧс ва...» — Тима Веньлӧн кывбурысь.

Парма-мамлӧн мича лола

Со и лоин, дона пи.

Тэнад сьӧлӧм биӧн олам

Уна-уна во нин ми.

Чужан муным зэв жӧ муса,

Зэв жӧ муса чужан кыв.

Кутӧ водзӧ коми русӧ

Миян гажа Эжва йыв.

Тырыс гижысь ӧшинь сайын,

Ставлӧн аслас «гӧр» да «йӧр».

Тэ моз велӧдам жӧ найӧс,

Медым сӧвмис подув вӧр.

Нималысьыс вель нин уна,

Кодӧс тӧдӧ Коми му.

Сяммӧны дзик ассьыс шуны,

Вуджӧны ас вӧр да ю.

Зіль Напалков * гижӧ уна,

И Ульянов ** оз жӧ узь.

Шебыревлы *** эм мый шуны,

Ногиевным **** гижны сюсь.

* Напалков — коми гижысь Виктор Напалков.

** Ульянов — коми гижысь Александр Ульянов.

*** Шебырев — коми гижысь Александр Шебырев.

**** Ногиев — коми гижысь Иван Ногиев.

Дерт, и шамыртлӧны шогъяс,

Волӧ жӧ век кассян во:

Абуӧсь нин Шахов вокъяс*,

Со и Тимушев ** эз ло.

* Шахов вокъяс — коми гижысьяс Пётр да Борис Шаховъяс.

** Тимушев — коми гижысь Эдуард Тимушев.

Да-й Игнатов * абу ловъя,

Лужиковлӧн ** сьӧлӧм кын.

Миян гижысьяслӧн овъяс —

Водзӧ овны борд да вын.

* Игнатов — коми гижысь Михаил Игнатов.

** Лужиков — коми гижысь Александр Лужиков.

Сійӧ-й бур, мый Эжва йывным *

Енбиаястӧг оз коль.

Оз кӧ талун бура кывны,

Аски воссяс налӧн ёль.

* Эжва йыв — Кулӧмдін район.

Кывбур кындзи эм и сьылан,

«Василейлӧн» * ыджыд гор.

Весиг суйӧр сайын кылӧ,

Сійӧ — саридз, абу шор.

* «Василей» — ӧнія выль коми сьыланкывъяслӧн фестиваль-конкурс.

Кыпыдӧсь на сідзсӧ лолӧн,

Нинӧмысь оз янав юр.

Но вель шогӧдӧ нин олӧм,

Сійӧ абу ёна бур.

Абу удж да мортыс тшыкӧ,

Кыдзи кутчысьны, оз тӧд.

Кор и власьтыс вӧлі пыкӧд,

Мед эн вишкы, мед эн бӧрд?

Сійӧ ӧд и тэнӧ виис,

Ньӧти мыжыд кӧть эз вӧв.

Нэмсӧ ӧзйӧ сотысь биыс,

Сійӧс пӧльтӧ беслӧн тӧв.

Гудыр-гадырас ми олам,

Дона мортӧй, вель нин дыр.

Веськыда кӧ шуны, полам,

Кӧть и вежӧрным эз быр.

Шуи: коръясӧкӧ сьылам,

Но век бӧрсянь вӧтчӧ шог.

Мича ягъясным моз сылам

Бура важӧн нин ми-вок.

Вужным, вӧлӧм, абу пыдын,

Бушков шлапкӧ козйӧс моз.

Уна сиктын йӧзыс лыда,

Оз нин сильгы ыджыд поз.

Локтӧм йӧзӧн дзикӧдз тырим,

Налӧн паськыдджык нин вуж.

Кӧнкӧ, регыдӧн ли дырӧн

Мӧд Куратов оз нин чуж.

Медым чужис, подув колӧ.

Сійӧ абу и оз ло:

Дзик нин рочасьӧмӧн олам,

Чинам лыдӧн воысь-во.

Коді вермӧ, карӧ мунӧ,

Кӧні чужан кыв оз ов.

Томъяс корсьысьӧны юны,

Налы веськодь кыв и лов.

Эз пӧ-й вӧвлы некор бурыс,

Век пӧ пыкам сӧмын шог.

Но ме сета сӧтны юрӧс —

Овлім, овлім мортъяс ног.

Быттьӧ тадз кӧ водзті вӧлі,

Эськӧ ме, веж вӧрса пи,

Бордъя пыжӧ эг и сӧвлы,

Эг и ӧзтыв ассьым би.

Эз жӧ эськӧ мукӧд кывны,

Кодъяс гӧльӧсь, зепныс куш.

Кынмис эськӧ коми кывным,

Нинӧм асланым эз чуж.

Коммунизмӧ мырдӧн мунны,

Гашкӧ, збыльысь, эз и ков.

Но и йӧйталӧмӧн шуны

Ме ог кӧсйы, пыксьӧ лов.

Бура дыр мен овны сюрис,

Мирын ёна кывсим кор.

Сэки уна вӧлі бурыс,

Шаня казьтыла, ог ёр.

Медся дона сӧвесьт вӧлі,

Вӧчан удж да сетӧм кыв.

Кывтыдын ли мӧдлапӧлын

Сэк эз россяв ласта выв.

ӧні деньга медся дона,

Ыджыд деньга, уна сьӧм.

Быдӧн кӧсйӧ сарӧн лоны,

Ачыс кӧть дзик вежӧртӧм.

Озыр озырмӧдчӧ водзӧ,

Гӧльлы озырлун оз шед.

Абу весьтын юрйыв кодзув,

Оз и быттьӧ шонді пет.

Дыр-ӧ тадзи ставыс лоас,

Вермас лоны, тӧдӧ Ен.

Гашкӧ, сэтшӧм вежӧр воас,

Мый оз кыпты вира вен?

Озыр гӧльлы восмӧн юкас,

Гӧльыс водзӧс вӧчас бур?

Некод некодӧс оз люкав,

Некод некодӧс оз пур?

Сійӧ бур, мый веськыд кывйысь

Он на дзескыдінӧ сюр.

Он на веськав ыджыд тывъяс,

«Уджалӧ» кӧ быттьӧ юр.

Ме со татшӧмторъяс «сӧра»

Да ог чегъялӧмысь пов.

Гашкӧ, сюралас на бӧрас,

Да оз ӧвсьы некыдз лов.

Сідзи важысянь нин мунӧ,

Мый Россияын поэт

Лысьтӧ ставлы кывмӧн шуны,

Йӧзлы бура овсис мед.

Вӧлі Пушкин, мездлун сьыліс,

Вӧлі Гоголь — чӧв эз ов.

И Есенин гора кыліс,

Вирӧсь власьтысь эз жӧ пов.

Тэ ӧд, дона Тима пиӧй,

Эн жӧ вомад васӧ кут.

Олін ыджыд сьӧлӧм биӧн,

Кӧсйин мувыв мортлы шуд.

Трипан Васьӧс ошкан висьтыд —

Став бур йӧзӧс доръян кыв.

Сійӧ сьӧлӧмъясӧ письтӧ,

Шонтӧ, быттьӧ мамлӧн сыв.

Ачыд повтӧм мортӧн вӧлін,

Быдса вӧлін, эн вӧв джын.

Джуджыд парма вуджин тӧлын *,

Вайин сиктӧс мездан вын.

* Джуджыд парма вуджин тӧлын — Тима Вень вӧлі гӧрд партизанъяслӧн котырын.

Гӧрдъяс вермисны, и накӧд

Йитін водзӧ оландыр.

Эн ӧд чайт, мый власьт жӧ-й лякас,

Виас бӧрти дзескыд жыр.

Тэ ӧд чайтін, тэ ӧд эскин,

Мый выль олӧм лоас бур.

Аслад сюмӧдӧн да пескӧн

Вӧчин югыдыслы нур.

И ме лачаӧн жӧ ола,

Мый оз пидзӧсчанясь Русь,

Кыпалас бӧр варыш лолӧн,

Кодйӧм гуранӧ оз усь.

Шаньмас мед и Коми муным —

Ыджыд Рӧдиналӧн тор —

Да и сусаскомысь лунын

Кылас миян коми гор.

Видза колян, дона мортӧй,

Коми мулӧн зарни пи.

Тэ ӧд гортын, и ме гортын,

Сідзкӧ, аддзысьлам на ми.

Йӧзлысь ловсӧ кыпӧдігӧн

Ставыс миян артмас мед.

Гижис Гриша Вась Лодыгин —

Эжва йывса жӧ поэт».