* * *

Тэнсьыд юрситӧ кымӧр сыналӧ,
Тэнсьыд банъястӧ кыа биалӧ.
Тэнсьыд морӧстӧ тӧвру малалӧ,
Тэнсьыд вом дортӧ шонді окалӧ.

Шедтӧм чери моз век на гыбалан,
Кыйтӧм пӧтка моз век на лэбалан.
Воттӧм пелысь моз век на ыпъялан,
Судзтӧм кодзув моз век на дзирдалан.

Тэ на-й вежӧрӧс менсьым путкыльтан,
Тэ на-й вӧляӧс менсьым кӧрталан.
Тэ на-й сьӧлӧмӧс менсьым бӧрддзӧдан,
Тэ на-й олӧмӧс менсьым югзьӧдан.