* * *

Судтанад тэ — понӧль,
Кызтанад тэ — пожӧм,
Мыгӧрнад тэ — пелысь,
Вӧраснад тэ — бадь.

Муслуннад тэ — тулыс,
Мичлуннад тэ — гожӧм,
Авъялуннад — арыс,
Кыпыдлуннад — тӧв.

Югыдлуннад — асыв,
Шоныдлуннад — луныс,
Мелілуннад — рытыс,
Чӧскыдлуннад — вой.

Веськыдлуннад — вомын,
Писькӧслуннад — чалльӧг,
Варовлуннад — визлач,
Сӧстӧмлуннад — ёль.

Кытыськӧ тай петін,
Кытыськӧ тай лоин.
Паныдасим коркӧ
Да эн бокӧ кеж.

Енъюгыдас тэ кодь
Некод сэсся абу.
Сё царица вылӧ
Тэнӧ ме ог веж.