* * *

Помтӧм-дортӧм кодзув йирас
Олам-вылам сӧмын ми.
Сӧмын мортлӧн шоныд вирыс,
Сӧмын сылӧн ӧзйӧ би.

Мыйла олам, дыр-ӧ олам,
Некод нинӧмсӧ оз тӧд.
Некод некытысь оз волы,
Некӧн абу мортлӧн рӧд.

Коркӧ тайӧ муыс бырас,
Бырам сы вылысь и ми.
Оз нин ӧзйы ӧшинь тырӧн
Чужан муын гортса би.

Оз нин муса гудӧк горав,
Оз нин некод йӧкты-сьыв.
Оз нин ветлы льӧм пу дорӧ
Тувсов кадӧ мича ныв.

Тэ эн юась, дыр-ӧ олам,
Бура ов дай, сійӧс тӧд.
Нолтӧ, морӧс бердӧ волы,
Сёрнит менам сьӧлӧмкӧд.

Ме ӧд том на, мыр кодь сирӧд,
Век на ӧзъя, век на би.
Помтӧм-дортӧм кодзув йирас
Дыр на олам тэкӧд ми.