* * *

Чегӧм дзоридз моз кулӧ сьӧлӧмӧй,
Кушӧдз, тыдалӧ, пӧсьыс петӧма.
Зэв тай дженьыдик нэмӧй вӧлӧма,
Зэв тай этшаник шудсӧ сетӧма.

Эськӧ вӧлін кӧ, гашкӧ, бурді на,
Кыткӧ-мыйкӧ да, гашкӧ, кокньӧдіс.
Тэтӧг дзикӧдз ме куті турдыны,
Тэтӧг чорыда менӧ шогӧдіс.

Эськӧ вӧлін кӧ, гашкӧ, ловзи на,
Кыдзкӧ-мыйкӧ да, гашкӧ, шоналі.
Тэтӧг, буракӧ, менам овсьӧма,
Шогыс ӧтнамӧс дзикӧдз помаліс.

Чегӧм дзоридз моз кулӧ сьӧлӧмӧй,
Кушӧдз, тыдалӧ, пӧсьыс петӧма.
Зэв тай дженьыдик нэмӧй вӧлӧма,
Зэв тай этшаник шудсӧ сетӧма.