* * *

Шудсӧ корсьны сёрӧн петі,
Кын нин вӧлі пелысь моль.
Но ӧд тэнӧ Енмыс сетіс,
Эз на ӧтнамӧс дзик коль.

Сывдіс шонді кӧдзыд русӧ,
Небзис ӧшинь улысь пуж.
Ёна жӧ тэ меным муса,
Весиг шунысӧ ог куж.

Кута дӧзмывлыны шоча,
Гашкӧ, весиг ньӧти ог.
Вай жӧ пуксьыв меным воча
Либӧ морӧс бердам лок.

Зэв на мича нюмыд петіс,
Зэв на визув, быттьӧ ёль.
Тэнӧ меным Енмыс сетіс,
Эз на ӧтнамӧс дзик коль.