ПЕЛЫСЬ СИКӦТША НЫВ

Лэптіс енэжыс юсьясӧс мусьыс,
Лымйыс усяс да, кӧнкӧ, оз сыв.
Муса томлунӧй дум вылӧ усис,
Пелысь сикӧтшнас петкӧдчис ныв.

Ӧні дойдӧ на сьӧлӧмӧс нылыс,
Некор паметьысь сійӧ оз вун.
Пелысь сикӧтшсӧ вӧчлі ме сылы,
Кор на окасьтӧг палявліс лун.

Кӧсъя вӧлі нин мыйкӧ да шуны,
Эз нин рытъяснас пукавсьы чӧв.
Сӧмын мусаӧй кытчӧкӧ муніс,
Быттьӧ таланьын некор эз вӧв.

Муса томлунӧй дум вылӧ усис,
Пелысь сикӧтшнас петкӧдчис ныв.
Бара кодӧскӧ мусаӧн шусис,
Кӧть и тулысӧдз лымйыс оз сыв.