* * *

Вайлы косатӧ, нылӧ, лэчтала —
Йӧзсӧ суан дай нӧшта ордйӧдан.
Меным эськӧ мед тэ и веськалан,
Менӧ эськӧ мед тэ и бордйӧдан.

Вайлы курантӧ, нылӧ, мольӧда —
Йӧзсӧ суан дай нӧшта водзалан.
Менӧ эськӧ мед тэ и кольмӧдан,
Мекӧд эськӧ мед тэ и коддзылан.

Вайлы пелыстӧ, нылӧ, сынышта —
Йӧзсӧ суам дай водзӧ курасям.
Меным эськӧ мед тэ и гымыштан,
Мекӧд эськӧ мед тэ и бурасян.

Вайлы вом дортӧ, нылӧ, чӧсмася —
Йӧзыс абуӧсь, ылӧ колисны.
Тэа-меалы ывла пӧртмасьӧ
Шонді сьӧвмӧса сикӧтш мольясӧн.