* * *

Корси тэнӧ гулыд ягысь,
Да эн сюр.
Эг пӧ аддзывлӧй на татысь,
Шуис ур.

Мед пӧ миян дорӧ волас,
Вотчигмоз.
Ми пӧ ӧктам, мыйта колӧ,
Коляоз.

Корси тэнӧ югыд раскысь
Пемдытӧдз.
Гашкӧ, кежалас пӧ аски,
Шуис кӧч.

Мед пӧ миян дорӧ волас,
Босьтас ноп.
Ми пӧ корсям, мыйта колӧ,
Чими гоб.

Корси тэнӧ парма шӧрысь,
Вӧлі чож.
Эг пӧ аддзывлӧй на вӧрысь,
Шуис ош.

Мед пӧ миян дорӧ волас
Ю горув.
Ми пӧ вотам, мыйта колӧ,
Чӧскыд пув.

Аддзи тэнӧ Кӧка шорысь
Войдӧрлун.
Он на, вӧлӧм, керка дорысь
Ылӧ мун.

Тулыс вӧлі еджыд вӧлӧн
Гуляйтӧ.
Тэ и меным колан вӧлі,
Сӧмын тэ.