* * *

Лӧз шальсӧ баба гожӧм дзебӧ,
А вижсӧ, уна да, оз дзеб.
Лӧнь саридз дорӧ дзодзӧг лэбӧ,
Тэ сӧмын некытчӧ эн лэб.

Мый вӧлі бӧръя кадас — вунӧ,
А челядьдырсяӧй оз вун.
Кын нюръяс вылысь тури мунӧ,
Тэ сӧмын некытчӧ эн мун.

Виж гобйӧн наберушка тырӧ,
А чӧскыд ельдӧгӧн оз тыр.
Юр весьтысь ӧшкамӧшка бырӧ,
Тэ сӧмын некытчӧ эн быр.

Руд енэж улын рака кылӧ,
А колип, кӧдзыд да, оз кыв.
Лым усьлас уль вылас да сылӧ,
Тэ сӧмын некытчӧ эн сыв.