ПОПЪЯС ЙЫЛЫСЬ
Коми газеттӧ дыр эгӧ вермӧ лэдзны да, газет лэдзаніннымӧс миянлысь тыртісны попъяс йылысь гижӧдъясӧн. Дерт, став гижӧдсӧ огӧ газетӧ сюйӧ. Сӧмын ӧтикӧс лоӧ кыскыштны, вывті нин ёна «мошкоритчӧ». Дерт, веськыда кӧ шуны, быдлаын попыд ӧткодь, важӧн нин кад вӧлі крестьяналы вӧлӧсьтъяссьыс попъяссӧ тодмышкавны, вичкоясас лӧсьӧдавны велӧдчанінъяс. Но коркӧ став йӧзыс казяласны. Ӧні пасйыштам поп йывсьыд. Кывзӧй.
Пожӧгын.
(Кулӧмдін карулын).
Эм пӧслӧвича — «Госа морт пӧ дурмӧ.» Сідз ӧд и эм. Миян Пожӧгын тай попным госсяліс да дурмис-а. Ыджыд лун дырйи сылы славитны эз лэдзны, ёна вӧлі йӧзыс висялӧны да, сэсся сійӧ славитіс тӧлысь мысти. Поплы кӧть кор ыджыд лун дыр, медтыкӧ доход вӧлі-а!.. Май 27-ӧд лунӧ (буретш тӧлысь!) славитіс Сьӧдтыдінын да Ыба сиктын. Попкӧд тшӧтш ветліс сылӧн радейтанторйыс — Лупа Клавди (важ манакиня, муртса кӧ пӧ оз вись лёквисьӧмӧн). Рытнад сэсся найӧ водасны ӧти дядьӧ ордӧ. Сэтысь найӧс ӧтик морт и аддзас, кӧсъяс кӧртавны кыкнаннысӧ ӧтилаӧ. Попыд садьмас, чеччас да чуньнас кутас таркӧдны (грӧзитны): тэ пӧ, Семӧн, эн дур, метӧг пӧ тэныд не овны, дзикӧдз вошан. Семӧныд попыдлы воча кыв видзас:
— Тэ, поп бать, дугды, эн таркӧд чуньнад — чуньтӧ орӧда, курчча! Кузь юрси ветлӧдлӧ!..
Мӧд праздникӧ Лупа Клавдиыд кырлӧсӧ сьывны пырас (быд праздникӧ кырлӧсын сьылӧ). Сійӧс сэтысь Приходскӧй Сӧвет и вӧтлас. Попыд тай сэтчӧ скӧрмас да, скӧрмас да, ризісӧ швырк пӧрччас да вичкосьыд и шутёвтас-пышъяс ӧбедня помасьтӧдзыс.
Со ӧд попным миян! Айда и поп! Вот колӧкӧ поп!
Юнь 1 лунӧ поп мунас ӧтик пир вылӧ. Пир вылад лӧсялӧма тшӧтш вичко старӧста. Сійӧ сэтысь поптӧ и вӧтлас:
— Мун, мун татысь!.. Мун ӧдйӧджык Лупа Клавди дінад!..
Со попыс! Сё чудеса-дивӧ кодь ӧд!
Быдлаысь вӧтлӧны «коньӧрӧс». Дзикӧдз нин колӧ шыбитны, мед мунас да олас Лупа Клавдиыскӧд!
Зі.
Колӧ эськӧ быд вӧлӧсьтӧ судзӧдавны газет «Безбожник». Сэні зэв унатор эм. Сійӧ газетыс абу дона — 15 ур тӧлысь. Адресыс со:
