ВОЛСЯ ВӦЛӦСЬТЫН

(Визин карулын)

Май 29‐ӧд лунӧ Санитарнӧй Комиссия видлалӧма Волсяса кооперативӧс. Джоджыс вӧлӧма зэв няйт. Тӧваръясыс куйлӧны сэн куш джоджас, лёкногӧн: кучикъяс ӧтилаын сёян припасъяскӧд, карасин выйкӧд. Кладӧвӧйясас сэтшӧм жӧ няйт. Инструктор кӧть и волывлӧ, оз, буракӧ, немтор казявлы.

Уджыс кооперативын мунӧ омӧля. Уджалысьясыс ёнджыка тӧждысьӧны ас понданыс, кыдзи эськӧ бурджыка лӧсьӧдны ассьыныс овмӧссӧ. Йӧзыд немтор оз аддзыны, быттьӧкӧ сідзи и колӧ. Важ приказчиксӧ вӧтлісны, сы пыдди лӧсьӧдісны выльӧс. Выль приказчикыд кыдз кужӧ, сідзи и уджалӧ, некодлысь юасьтӧг. Председательыс юысь морт. Видз-му уджалан кӧлуйяс колӧ вӧлі вузавлыны донсӧ содтытӧг, миян кооперативын тадзтӧ тӧргуйтныыд оз кужны. Татшӧм кӧлуйясыс вылӧ донсӧ содтӧма 25%-сянь 50%-ӧдз. Плугъяс колӧ вӧлі вузавлыны 9 шайтӧн да 50 урӧн — вузалӧны 12 шайтӧн да 50 урӧн, — со ӧд кыдзи миян кооператоръясыд вӧчӧны! Тешкодь, видзӧдны кӧ пондан лоӧ. Воас кооперативӧ тӧвар, быдӧнлы быд лун медъёна колантор — ем. Быд ем сулалӧ, шуам, 1 ур. Ченитігӧн 1 ур дінад содтасны: ур джын вайӧмысь, 1 ур служащӧйяслы, 1 ур ревизионнӧй комиссиялы да ур джын кооперативлысь капитал содтӧдӧ. Емыд пондас мужикыдлы сулавны 1 ур пыддиыд 4 ур.

Со кыдз уджалӧны миян кооператоръясыд. Колӧ вӧчны, мед татшӧм уджыдлы регыдджык воас пом.

Кооператив видлалан лунӧ тайӧ жӧ комиссияыс видлалӧма Волсяса вичко. Видлалӧмаӧсь дари дозъяссӧ, вом дор чышкан ротъяссӧ. Ставыс вӧлӧмаӧсь зэв няйтӧсь. Дари дозйыс няйтнас тырӧма нин. Попсӧ юалӧмаӧсь, мыйла нӧ пӧ онӧ мыськӧ, видзӧ сӧстӧмджыка? Попыд шуӧма, оз пӧ позь. Сідзи вӧлӧм няйта даринад и паньӧдӧны, да сы бӧрын няйт ротӧн вом дортӧ чышкыштӧны. Мыйта дзоньвидзалун тадзи йӧзыдлысь воштасны попъясыд! Мортыд кӧ висьмас — некор некод оз шу: даръясьӧмысь пӧ тайӧ вуджис; ёнджыка кӧ вӧлӧм думыштан — дарисяньыд медся ёна разалӧ вуджан висьӧмъясыд. Колӧ татшӧм висьӧм разӧдӧмъяссьыд попъястӧ ӧлӧдны, йӧзыслы видзчысьны.

Сьӧкыд пель.