АЙКАТЫЛАЫН (АЙКИНО)

(Емдін карулын)

Лӧсьӧдӧны электричество.

Крестьяна кутчысисны вӧчны электрическӧй станция. Кӧсйӧны нуӧдны электричество Айкатыла да Шежам кузя. Локтан арӧдз кӧсйӧны став уджсӧ эштӧдны. Станция дорас кӧсйӧны лӧсьӧдны мельнича.

Куим кооператив. Выль ногӧн уджалӧны.

Вӧлӧсьтын уджалӧны куим потребительскӧй кооператив. Шленас пырӧмаӧсь 290 морт. Кӧзяйство лыдыс эськӧ став вӧлӧсьтас 1083 да, мыйлакӧ этшаджыкӧн на жӧ пырӧмаӧсь. Медся лӧсьыда уджалӧ Айкатыласа кооператив. Тайӧ кооперативыс кутчысьӧма Удораӧ грузъяс нуны аслас шленъяслы нажӧтка сетӧм понда.

Сідзи жӧ вӧлӧсьтын эмӧсь выль ногӧн видз-му уджалӧм понда тӧждысьысь кооперативъяс, удждысян тӧварищество (татчӧ 230 морт нин пырӧма), сир вӧчан артель, вый вӧчан артель да мукӧд пӧлӧс ӧтувтчӧмъяс.

Выльнога олӧм лӧсьӧдны вӧлӧсьтын чорыда кутчысьӧмаӧсь. Овлӧны спектакъяс, сёрни вылӧ чукӧртчывлӧмъяс. Февраль тӧлысьын тайӧ воӧ лӧсьӧдӧмаӧсь ячейка заграничаса эмбуртӧмъяслы отсавны. Тайӧ ячейкаас пырӧмаӧсь 9 морт, мынтӧны кык шайтӧн во. Сідзи жӧ Айкатыла сиктас эм кружок, шусьӧ «Безбожникӧн». Пырӧма тайӧ кружокас 39 морт. Вӧлӧсьтын 9 партийнӧй морт.

Газет лэдзанінсянь: Айкатыласа чорыда нин заводитӧмаӧсь выль ногӧн уджавны. Мукӧд вӧлӧсьтсалы оз ков наысь кольччыны. Ӧтитор сӧмын Айкинаса вунӧдӧмаӧсь: толькӧ куим морт корӧ газет «Югыд туй». Колӧ быд 10 керка вылӧ корны, сэки лӧсьыд лоӧ.