МЕЗДЫСЬ БАЛЯБӦЖТӦ ГЫЖЪЯЛӦМЫСЬ!

Ӧні сёрнитан деревняса мужикъяскӧд да, ёна каитчӧны колян вося билет ньӧбтӧмысь. Унаысь пӧ балябӧжнымӧс гыжйыштлам, да некысь. Ӧти мужик шуӧ: нарошнӧ пӧ волі карӧ билетъяссӧ ньӧбны, комын шайт сьӧм гортысь вайлі. Эг ӧд ньӧб! Повзьӧдісны. Ёртъясысь гусьӧн сӧмын 10 шайт вылӧ босьті. Прамӧй бур йӧз ӧд повзьӧдісны, павкӧдісны билетсӧ ньӧбӧмысь. Шуӧны: «Коммунистъясыд пӧ ӧд пӧръясьӧны, весь крестьянаыслысь ылӧдлӧны сьӧмсӧ. Кодлыкӧ пӧ, кӧнкӧ, выль керка сувтӧдны, либӧ галифе гач ковмис лӧсьӧдны, дай удждысьӧны. Энӧ, энӧ кывзӧй налысь, энӧ билетъястӧ ньӧбалӧй! Вошӧ сьӧмныд».

Пельӧс сайын татшӧм лёк вашкӧдӧмыд пемыд мужикъясыдлы ёнджыка юрас пырӧ бур гижӧдъяс дорысь, чуксасьӧмъяс дорысь. Мужикыд оз тӧд, кодлысь и кывзыны: ловъя мортлысь-ӧ, гижӧдысь-ӧ. Ловъя морт, тӧдӧмысь, вермас: оз омӧля сьыв сійӧ пель водзын. Гижӧдтӧ ӧд пемыд велӧдчытӧм мужикыд оз аддзы, вежӧравны сы йылысь оз вермы лючки. Муртса кӧнкӧ коркӧ пель пырыс муныштлас да: «Колӧ пӧ ньӧбны, вузалӧны». Мый вӧсна колӧ ньӧбны, мый сыысь бурыс — сійӧ и оз тӧд. Лёк йӧзыд сэсся зэв кокниа найӧс ылӧдасны. Асьныс радлӧны, нимкодясьӧны: «Бара на пӧ ӧти йӧй сюри, сылӧн билетыс менам киын лоӧ. Мӧдысь сылы жӧ кык донӧн вузала. Ог кӧ вермы вузавныс, став бурыс аслым, ӧтнамлы лоӧ. Билет ковмӧма! Озырмыны кӧсйӧ!..»

Мужик балябӧжсӧ гыжъялас, гыжъялас, дай эновтчас билет ньӧбӧмысь.

Мӧдысь, срок кольӧм бӧрас, кор ас синнас мужикыд аддзас билет ньӧблӧмысь бурсӧ — казялас, коді сійӧс пӧрйӧдліс. Балябӧжыс сыысь ёна луддзас. Сёр, гыжъяв кӧть эн, немтор сэсь он пычкы!

Сы вӧсна, ёртъяс, энӧ кывзӧй ӧнія билет ньӧбалігӧн лёк йӧзлысь. Ньӧбӧй, коді мыйта вермад. Бурыс лоӧ тіянлы. Мездысьӧй балябӧжтӧ гыжъялӧмысь!

А—а.