ПУЯСТӦ КОЛӦ ВИДЗНЫ

Коми муын, да и Роч муын эм мода Троица лунӧ ваявны ӧшинь улӧ кыдз пуяс. Лыддьыны кӧ, артавны ставсӧ — кымын пу ӧти лунӧ тшыкӧдӧны-воштӧны! Тӧдӧмысь, вужтӧм пуыд ӧшинь улад дыр оз ов: лун-мӧдӧн косьмас, челядьлы ворсантор сӧмын лоӧ да ывлавыв ёгӧссяс. Быдмас кӧ сійӧ пуыс ас местаас помӧдзыс, мыйта бур ваяс крестьянаыдлы.

Ӧшинь ув ӧти лун кежлӧ кыдз пуясӧн баситӧм — языческӧй мода. Кад сійӧ модаысь эновтчыны, шыбитны сійӧс ньӧтчыд лолытӧм вылӧ. Пуяс тшыкӧдалӧм, виалӧм праздник пыдди бурджык лӧсьӧдны «пу садитан» праздник. Ми унаысь шулывлам: В. И. Ленинлысь тшӧктӧмъяс, шуӧмъяс оз ков вунӧдны. Сідзкӧ пуяс пӧрлӧдлыны весьшӧрӧ оз ков, Лениныд зэв сійӧс мустӧмтліс да омӧльтліс. Сы йылысь со кутшӧм висьт эм.

Владимир Ильич бурдӧдчанінын, Горкиын, садъяс, туй шӧрас вӧлӧм быдмӧ пу.

Ӧтчыд гуляйтігас Лениныд зэв ёна шензьӧма пу пуктысьыс вылӧ — колӧ жӧ пӧ вӧлі туй шӧрӧ пуктыны, уджалӧма жӧ сылӧн юрыс!..

Шензьӧмсӧ да кывъяссӧ сылысь кодкӧ висьталӧма Горкиса совхозас. Сэні кӧзяйство нуӧдысьыс важ коммунист нин, В. ёрт. Сійӧ кӧсйӧма бур вӧчны Лениныдлы: босьтӧма да сійӧ жӧ войнас пилитӧма пусӧ му бердтіыс. Ленин ёрт петӧма аскинас гуляйтны — пу абу. Зэв ёна скӧрмӧма. Пырысь-пыр жӧ тшӧктӧма тӧдмавны пу кералысьӧс.

Локтӧма сы дінӧ важ коммунистыд. Ленин ёрт сьӧлӧм бурмытӧдзыс видӧма сійӧс:

— Кымын пу ачыд пуктін? Ӧтиӧс эн? Сійӧ со и эм. Дась пуктӧмтӧ кокни керавныд, пуктыны сьӧкыд, дыш! Зэв лёк удж пу кералӧмнад вӧчӧмыд, прӧститны тэнӧ сыысь оз позь.

Сэсся В. ёртӧс Ленин тшӧктӧма арестуйтны кык вежон кежлӧ.

— Да мед непременнӧ кык вежонсӧ пукалас! Мӧдысь оз кут весьшӧрӧ пуяс перъявны!

Со кутшӧма Ленин ёртыд жалитлӧма да видзлӧма пуястӧ. Миянлы сідзи жӧ колӧ.

Сы вӧсна Ленинӧс казьтылӧм кузя кӧ быд воӧн пуктыны кӧть ӧти пуӧн быд мортлы, лоӧ зэв ыджыд бур.

А. Ч.