ЭГӦ ДУМАЙТЛӦЙ, ЛОАС МИЯН КОМИ ГАЗЕТ
Думайтан да шензьыныд он вермы, кыдзи вежласьӧ пӧраыд, олӧмыд. Войдӧр, сар дырйи, коми олысьяс весиг огӧ вӧлі тӧдӧй мӧда-мӧдлысь олӧм-вылӧмнымӧс: каргӧгӧрса йӧз оз вӧлі тӧдны, кыдзи олӧны, шуам, Удораын, Изьваын, Тшугӧрын, Леткаын. Сэтчӧс йӧз оз тӧдны вӧлі бара, кыдзи олӧны каргӧгӧрса йӧз, сідзжӧ мукӧд комияслысь олӧм. Письмӧасьӧмӧн быдтор гижны он вермы; ас газет эз вӧвлы. Роч газетыд эськӧ вӧвлі, да сэн гижлісны сӧмын роч йӧз олӧм йылысь. Эмӧсь коми олысьяс жӧ мукӧд губерняясын: Перымскӧйын, Ятскӧйын, Тобольскӧйын, татчӧс олысьясыд бара жӧ оз тӧдны налысь олӧм-вылӧмсӧ, сідзжӧ найӧ оз тӧдны миянлысь ӧлӧм-вылӧмнымӧс. Олӧм жӧ ӧд вӧвлӧма комиясыдлӧн: мӧда-мӧдтӧ огӧ тӧдӧй, кыдзи оламӧй!
Ӧні миян, коми олысьяслӧн, эм нин асланым коми газет — «Югыд туй». Думайтны вӧлі он куж, со пӧ коркӧ лоас коми газет. Лоис ӧд! Бур йӧз, посни эновтӧм йӧз дор тӧждысьысьяс, лӧсьӧдісны. Коми йӧзлы колӧ шуны налы «зэв ыджыд коми пасибӧ!» Ӧні «Югыд туй» газетӧн зэв нин лӧсьыд тӧдмавны коми олысьяслы мӧда-мӧдлысь олӧм-вылӧмсӧ: видз-му уджалӧм, скӧт видзӧм, уралӧм-вӧралӧм, сортовка лэдзӧм, нажӧвитчыны ветлӧм мӧд губерняясӧ, юӧм-сёйӧм, пасьтасьӧм, мунӧм-локтӧм (гӧтрасьӧм), чужӧм-ловзьӧм, кулӧм, семья кост олӧм, вуз-вот мынтӧм, вузасянінъяс, мастерскӧйяс восьтӧм, шога, дзескыда олӧм — ӧтпыр шуны, быдсяматор. Ставыс гижӧм сайын. Быдӧнлы, коді мый вермӧ, коді мый кужӧ, колӧ гижны редакцияӧ. Кужтӧмысь повны оз ков. Кыткӧ кӧ абу ладнӧ, редакция лӧсьӧдас кыдз колӧ, сійӧ сы вылӧ и редакция. Кымын уна пондасны гижны быд сиктысь, быд деревняысь, сымын ёнджыка пондамӧй тӧдны мӧда-мӧдлысь олӧмнымӧс, сымын йӧзыд сюсьмасныджык, вежӧрмасны, пондасны гӧгӧрвоны; сымын бурджык олӧм мӧдӧдчас коми йӧзлӧн. Ӧнӧдз деревняяссяньыд зэв на этша гижӧны, овлӧ мукӧддырйиыс: печатайтны пӧ нинӧм, сы вӧсна и коми газетыд шоча петӧ.
Весьшӧрӧ абу пуктӧма коми газетыдлы ним «Югыд туй». Коді мунас тайӧ туйӧд, сійӧ шӧрӧ оз вош. Колӧ сійӧс унджыкысь лыддьывлыны — да кывзыны велӧдчытӧмъяслы. Колӧ быд сиктӧ, быд деревняӧ судзӧдны кӧть этшаник газет. Ӧткӧн кӧ он вермы, позьӧ тэчсьӧмӧн, сьӧмыд сы вылӧ зэв этшаӧн воас морт вылӧ; дасӧн кӧ судзӧдан тӧлысь кежлӧ ӧти газет, сӧмын 5 урӧн и воас морт вылӧ.
Ме шуа коми войтырлы: ті ӧд абу на велалӧмаӧсь газеттӧ лыддьыны. Унджыкысь кӧ понданныд босьтлыны киад, лыддьыны, понданныд гӧгӧрвоны — коминад ӧд, дерт, гӧгӧрвоанджык рочӧн дорсьыд, — сэки пондад тӧдны быдтор: кӧні мый вӧчсьӧ, кӧні кыдз олӧны; лоас телепит лыддьысьныд, кыдз куритчысьяслы телепит куритчыны.
Энӧ вунӧдӧй: миянӧс пемыд туй вылысь югыд туй вылӧ вермас петкӧдны сӧмын миян коми газет «Югыд туй».
Сыктывдінкарын «Югыд туй» газет кындзи петӧны ещӧ, роч кыв вылын: журнал (нига) «Коми му» да газет «
Н. Чеусов.
