ПӦРЫСЬЯС ТОРКИСНЫ

Лунысь лунӧ том йӧз ёнджыка кутчысьӧны олӧм бердӧ, кывзӧны Сӧвет власьтлысь бур индалӧмсӧ. Союз молодёжиӧ пырӧм куим том морт Шорйыв деревняын Волся вӧлӧсьтын корӧмаӧсь му уджавны ӧтвыв, петкӧдлыны йӧзлы выль ногӧн му уджалӧм. Удж нуӧдысьнас сэні кӧсйӧма лоны куим во Уллянаса с-х. школаын велӧдчӧм морт — Юркин ёрт. Сетлӧмаӧсь налы 1.000 кв. сажень му ӧти йӧрысь. Юркин ёрт кӧсйӧма нин юкны мусӧ сизим пельӧ, заводитны кӧдзны. Кӧйдысъяс — нянь да турун — заптӧма нин сылӧн водзвыв.

Эз вевъявны водзмӧстчысь куим том морт ас удж бердас лючки кутчысьны, пӧрысьяс торкисны найӧс. Чукӧртісны скод, бӧр мырддисны налысь мусӧ. «Ми пӧ медвойдӧр огӧ жӧ заводитӧй выль ногӧн му уджавны. Мед кодъяскӧ мукӧд войдӧр видласны, бур кӧ лоӧ, вӧлисти и ми сідзи кутам уджавны. Тшыкӧдасны тайӧяс мунымӧс дай, мый налысь босьтан. Огӧ сетӧй».

Со ӧд кутшӧма пӧрысь йӧзыд полӧны выль нога му уджалӧмсьыд. Асьныс эськӧ оз нин уджавны, да мукӧдыслы оз лэдзны. Коньӧръяс, пемыд войтыръяс.

Пондам надейтчыны, бӧр тӧлквыв пуксяд ті, олӧма войтыр, сетад водзмӧстчысь куим том ёртлы му — петкӧдлыны аслыныд жӧ выль ногӧн, кокньыдджыка уджалӧмӧн унджык нянь босьтӧм. Надейтчам, бӧрӧ восьлалӧмысь дугдад, водзӧ да водзӧ кутад восьлавны, петкӧдлад мукӧд пемыд йӧзлы выль нога олӧм да уджалӧм.

Акинь пи.