ЕЩӦ ПАРЧӦГ ЙЫЛЫСЬ

103 № «Югыд туй» газетын 9 лунӧ май тӧлысьын вӧлі гижӧма «Парчӧгса том йӧзлӧн олӧм». Миян ногӧн, тайӧ заметка гижысьыс вӧлі сэтшӧм морт, коді оз тӧд, мый шусьӧ югыдлань петкӧдӧмнас, либӧ абу Парчӧгса морт, Парчӧгса кӧ вӧлі, дерт, тӧдліс миянлысь уджалӧмтӧ, арсяньыс ми ӧтвылысь том йӧзыдкӧд пуктім 16 спектак (абу этша деревняад). Сэсся нинӧм абу вылад сценасӧ быд спектакӧ вӧлі тупкалам прӧстыняясӧн да эшкынъясӧн. Ӧти парик ни, нинӧмыс абу; быд спектак вылӧ бара вӧлі колӧ вуравны да вӧчавны нинӧмсьыд. Ворсысьясыд век вежсьӧны, важ вӧчалӧмъяссӧ том йӧзыд бӧр гортас нуӧны: «Мамӧ пӧ бӧр корис шабдітӧ!» Уна рыт и вой татчӧ том йӧзлӧн и учительяслӧн мунліс. Луннад ӧд крестьяна оз эштыны, дай ми школаад быд лун жӧ велӧдам.

Сэсся эм союз Ленинцев, кӧні ӧти велӧдысь председателялӧ. Союзыд эз жӧ узь, тӧвбыд уджаліс, кыдзи кужис, вермис. 19 собранньӧ вӧчис, протоколъяссӧ гижӧма, кӧні велӧдысьясыс висьтавлісны уна докладъяс, уна и лыддисны Ленин йылысь да мукӧдтор. Том йӧзыд доклад бӧрас вӧлі асьныс гижӧны, кыдз гӧгӧрвоасны докладсӧ. Дерт, эз унаӧн сідзтӧ вӧчны, некор пӧ, шуӧны вӧлі. Мукӧдыс весиг асьныс вӧлі висьтавлӧны йӧзлы докладъяс (А. Юшков — клевер кӧдзӧм йылысь). Дивӧ миянӧс кутӧ: тыдалӧ, тайӧ заметкасӧ гижысьыс абу зэв прӧсуж. Ӧд став уджыс миян гижӧма союзса секретаръясӧн.

Парчӧгса школаын велӧдысьяс:

А. Никитина, А. Серкова.