МЕДВОДДЗА ЮӦР САМӦКУРКӦД ВЕРМАСЬӦМ ЙЫЛЫСЬ

Социальнӧй Страхованньӧлӧн Управленньӧыс юнь 2-ӧд лунӧ видлалӧма воӧм гижӧдъяс аслас Визин карувса уполномоченнӧй М. И. Истомин самӧкур юӧм йылысь да шуӧма: сетны Истоминлы выговор газетӧ гижӧмӧн, мед йӧзыс ёнджыка дивитасны Истоминӧс самӧкур юӧмысь.

Унаысь нин миян газетӧ гижӧма вӧлі, кутшӧм ыджыд лёк вӧчӧ самӧкурыд. Сы понда зэв унаысь овлывлӧны мыж вӧчӧмъяс, мортъясӧс виӧмӧдз.

Самӧкур юысьяс воштӧны ассьыныс дзоньвидзалуннысӧ. Докторъяс шуӧны — самӧкур пондаыд пӧ кӧласьӧ быдсикаса висьӧмыс. Медся ёна ньӧжйӧник омӧльтӧ мортыдлысь сьӧлӧмсӧ. Пьянство миян коми йӧз пӧвстын зэв ёна паськалӧма. Юӧны: мужикъяс, бабаяс, челядьяс. Страм ӧд тайӧ! Асьным, тыр юр вежӧра йӧз татшӧмӧдз вермам лэччысьны! Йӧз смек, быдӧн нин мукӧд кывъя йӧзъяс миян вылын серавлӧны.

Вайӧ жӧ ютӧмъяс, нывбабаяс, том йӧз, ӧтувтчывлӧ да чорыдджыка кутчысьлӧй веж змейкӧд вермасьны, кыпӧдалӧй йӧз смек вылӧ Истомин кодьястӧ! Куталӧ самӧгон вӧчысьяссӧ, юысьяссӧ, мед накӧд заводитласны вермасьны судъяс.

П-сь.