ВЫЛЬ ЛЫДДЬЫСЯНІН

Неважӧн помасис Ставрочмувывса коммунист партиялӧн дас коймӧд съезд.

Уна буртор тайӧ съездыс шуис вӧчны. Медся ёна сэні сёрнитісны деревняса крестьянаӧс югдӧдӧм йылысь. Крестьяна асьныс тӧдӧны — колӧ велӧдчыны выль ногӧн овны, асьныс тӧждысьӧны бур олӧм лӧсьӧдӧм понда, сӧмын ас кежаныс оз вермыны найӧ велӧдчыны.

Коммунист партиялӧн Съезд шуис: медбур велӧдчанін деревняын — вӧлӧсьтувса лыддьысян керка (изба-читальня). Лыддьысян керкасӧ лӧсьӧдны сӧмын выль ногӧн, важ мозыд кӧ кутан видзны — ыджыд пӧльза оз ло сыысь.

Лыддьысян керкалӧн колӧ лоны медвойдӧр Сӧвет (юралысь). Тайӧ Сӧветас пырӧны: крестьяна костысь бӧрйӧм йӧз, исполкомысь, коммунист партияысь, комсомолысь, кооперативысь, йӧзӧс велӧдан профсоюзысь, видз-му-вӧр дорын уджалысьяс (всеработземлес) профсоюзысь. Бӧрынджык сэтчӧ кыскыны колӧ учительясӧс, агрономъясӧс, землемеръясӧс, пельшӧръясӧс. Тадзинад лыддьысян керкаыд лоӧ непӧштӧ велӧдчанінӧн, лыддьысян керкаыд лоӧ велӧдысь чукӧрӧн — сэні лоӧ став вӧлӧсьтувса силаыс.

Лыддьысян керкаыд сэки кутас велӧдны крестьянаӧс, дай асьныс велӧдысьясыс ӧтчукӧрад кутасны велӧдчыны. Татшӧм лыддьысян керка сӧмын вермас регыдджык югдӧдны деревняса пемыд войтырӧс, регыдджык вермас сувтӧдны йӧзӧс мича туй вылӧ, выль олӧмӧ босьтӧдны.

Чорыдджыка кутчысьӧй, коми йӧзӧс велӧдысьяс, коми крестьянакӧд тшӧтш лӧсьӧдны деревняясӧ выль лыддьысян керкаяс!