ПЕТКӦДЛӦЙ ЛЕНИН ДЯДЬЛЫСЬ ЧУЖӦМСӦ

Коми грездъясын унаысь юасьлывлӧны Ленин, Троцкӧй да мукӧд гӧль йӧз вӧсна тӧждысьысь ёртъяс йылысь. Зэв бура кывзасны висьтавлӧмтӧ, сэсся жугылясьӧны: онӧ пӧ чужӧмсӧ налысь вермӧй петкӧдлыны миянлы. Кутшӧмӧсь пӧ бара эмӧсь-а? Школаясын велӧдчысь челядь пыр жӧ шуасьӧны: кутшӧм пӧ бара Ленин дядьыслӧн чужӧмыс вӧлі-а?

Кылан татшӧм сёрнитӧ да, сьӧлӧмыд майышмунӧ. Сизим во долям Ленин йылысь, сизим во уджалам Сӧвет власьт дырйи, асланым кипод улын асьнымӧс мездысьяслӧн, миян дор ловнысӧ жалиттӧг сулалысьяслӧн весиг портретыс абу. Огӧ вермӧй петкӧдлыны найӧс велӧдчысьяслы, олӧма гӧль йӧзлы. Ёна жӧ гӧльӧсь ми, деревняса олысьяс.

Мӧдарӧ — карын миян дор сулалысь гырысь йӧзлӧн портретъясыд уна, мукӧдлаас лишнӧйӧсь — бумага пиын куйлӧны. Удж нуӧданінъясад куим-нёль, унджык ӧти пӧлӧс портретыс ӧшалӧ, быд ӧшинь костын. Абу-ӧ бурджык сэтшӧминъяссьыс чукӧртны найӧс Обоноӧ школаясӧ разӧдӧм вылӧ?

Петкӧдлӧй Ленин дядьлысь чужӧмсӧ посни челядьлы да гырысь войтырлы. Быдӧнлы гаж петӧ видзӧдлыны сы вылӧ.

Акинь пи.