ЛӦСЬӦДАЛӦЙ ЭЛЕКТРИЧЕСТВО

Миян Коми муын эм уна посньыдик юяс. Мукӧдлаас вӧчалӧмаӧсь мельничаяс, кожовняяс. Но унджыкыс сідз визувтӧ: некутшӧм пӧльза мортлы оз сетны. Мельнича изкитӧ эськӧ бергӧдлӧ да, уна на валӧн выныс сідз ортсӧ мунӧ. Мукӧдлаын кӧ эськӧ небось сійӧ вынтӧ бокӧ эз лэдзны — восьталісны пабрикъяс, заводъяс... Сэтчӧ оз ков нарошнӧ бергӧдлан машина — выныс дась: лӧсьӧд толькӧ турбина (ва кӧлеса), ваыс ачыс кутас бергӧдлыны.

Гырысь пабрик-заводъяс, дерт на, миян ӧні регыдӧн оз сувтны. Но посниджыкторъяс вермам вӧчны. Шуам кӧть, электричество перъян машина. Судзӧдан динамо, лӧсьӧдан турбина — сэні и ставыс. Сійӧ позянтор. Дерт, рӧскодыд лоӧ, да ӧд рӧскодтӧгыд нинӧм оз артмы. Сыысь ыджыд рӧскодӧн на вӧчӧны, шуам кӧть, вичкояс. Артыштан кӧ, мыйӧ сувтӧ вичкоыд — сійӧ деньга вылад электричество станцияыд кызь артмас. А пӧльзаыс кодарас унджык? Ӧтарас пемдӧдӧны, мӧдарас югдӧдӧны. Посньыдик юяс миян эм быдлаын. Шуам кӧть, Помӧсдінын. Ю матын, помны лӧсьыд, мельнича бердас и позяс. Кык бур лоӧ — пызь и би. Динамо абу дона, турбина артмас. Деньга позьӧ босьтны уджӧн банкысь. Чукӧстчалӧй, сёрниталӧй да гижӧй та йылысь, коді гӧгӧрвоӧ.

С.