СӦМЫН БУРӦН — БУРӦН ОЗ КЫВЗЫНЫ

Быдӧн тӧдӧны, коми йӧзыд миян зэв на унатор оз вежӧртны. Вежӧрттӧм пондаыс лоӧ быдсяма омӧльторъяс. Босьтам видз-му уджалӧм. Эм нин Обласьтса Исполкомлӧн тшӧктӧм (обязательнӧй постановленньӧ) не лэдзны скӧтӧс видз вылӧ ни, му вылӧ ни, лым сылӧмсянь тулысын видз пуктысьтӧдз, нянь босьттӧдз арын. Та вылӧ ньӧти оз видзӧдны — пыр на лэдзӧны скӧттӧ. Ме ог тӧд, гашкӧ, мукӧдлаын оз нин лэдзны, миян Выльгорт вӧлӧсьтын став скӧтыс видз вылын, тшӧтш му вылын, ӧзим вылын, зэв ёна жугӧдӧны, талялӧны ӧзимсӧ.

Видзтӧ сідз жӧ талялӧны, лойӧны. Видз-му гӧгӧр потшӧсъяс ставыс киссьӧма, жугавлӧма омӧльысла, мукӧдсӧ пӧрӧдӧмаӧсь потшӧс суддяяс, бара жӧ омӧльысла. Некод оз потш выльысь, либӧ сӧмын ӧткымын потшӧны. Уроныд аслыныс жӧ, крестьянаыдлы, лоӧ вывті уна. Видзьясыд зэв ёна тшыкӧны: топалӧ, вутшкӧссьӧ, лойсьӧ.

Потшӧс суддяяс эськӧ зэв жӧ бурӧн тшӧктӧны йӧзтӧ потшныд да, дзик ньӧти оз кывзыны.

Пондан шуны Исполкомскӧй председательлы, мед кутшӧмкӧ мера примитас, сійӧ ӧтарӧ шуӧ: ме пӧ нинӧм керны ог вермы, меным пӧ некутшӧм власьт абу сетӧма лёкӧн топӧдны, накажитны, став мир вылас пӧ акттӧ вӧчны ог вермы, дай ог лысьт; кӧть пӧ и вӧчан, бара жӧ пӧ делӧыс дыр нюжалас, скӧтыд пӧ сы кості ӧстатки ӧзимтӧ, видз вылад турун петастӧ йирас; дзик пӧ ыджыд мат.

Председательыд, ме ногӧн, висьталӧ правда, власьтыд некутшӧм абу. Колӧ Сӧвет власьтыдлы сетны председательясыдлы власьттор — мед вермасны судтӧг, регыдджыка мыйӧнкӧ мыждыны кывзытӧм, пыксьысь йӧзсӧ либӧ найӧ тшӧт вылӧ потшны потшӧсъяссӧ. Сэк эськӧ пондісныджык кывзынытӧ. Мый керан: дерт эськӧ, накажитнытӧ абу лӧсьыд да, лоӧ тай, кӧсъян кӧ няньтӧ да турунтӧ босьтны. Та йылысь Обласьтса Исполкомлы колӧ мый‐нибудь вӧчны либӧ аслыс, либӧ Центрӧ гижны, мед председательлы сетасны власьт пуктыны мыжаяс вылӧ наказанньӧ судтӧг, немся нюжйӧдлытӧг.

Крестьянин.