ВОАНА УДЖДЫСЬӦМ КРЕСТЬЯНАЛЫСЬ ДА КООПЕРАЦИЯ

Быд гӧгӧрвоысь крестьянин тӧдӧ ыджыд бур «Воана удждысьӧм» билет ньӧбӧмысь. Сійӧ буръясыс унаысь нин вӧлі урчитӧма газетъясын, гижны выльысь немторла. Коді колян во ньӧбліс нянь вылӧ удждысьӧм, ме чайта, эз каитчыв. Воттӧ мынтігӧн кутшӧм лӧсьыд сылы вӧлі: эз ков мешӧкъясӧн ноксьыны, лун-вой сёйны. Сӧмын со кӧні матыс: кыдзи сійӧ билетсӧ судзӧдны, мый вылӧ ньӧбны? Ӧні крестьянаыд буретш деньгатӧмӧсьджык. Асшӧр няньыд ӧд вотӧ вуджны уналӧн оз тырмыв, тулыснад, гожӧмнад ёна лоӧ ньӧбасьны. Сэсся ӧд уналӧн кӧйдысъясыд абуӧсь. Быдлаӧ сьӧм колӧ. Крестьяниныд эськӧ и рад ньӧбас билеттӧ, да сьӧмыс абу. Кыдзи петны тайӧ ыджыд пикысь?

Вӧлӧсьтъясын эмӧсь кооперативъяс — гӧль йӧзлы отсасьысьяс. Налы и колӧ ӧні сувтны отсасьны. Кооператив вермас судзӧдны аслас шленъяслы билетъяссӧ Райсоюзсьыс, уджӧн. Сэсся шленъясыд ньӧжйӧникӧн вештасны нин сэсь билеттӧ. Кооператив пырыд судзӧдӧмнад лун-войыд уна йӧзлӧн оз вош, оз ков быд мортлы лэччывны карӧдз. Артельлы ӧтпырйӧ судзӧдасны, ӧти морт ветлас.

Отсав, кооператив, гӧль йӧзлы, тэрмасьджык ньӧбны-разӧдны на костӧ «Воана удждысьӧм» билетъяс. Зэв ыджыд бур ваяс тайӧн кооперативыд аслас йӧзлы да и государстволы, ыдждӧдас, паськӧдас ассьыс вузасьӧмсӧ, матысмӧдас ас бердас уна мортӧс.